“Bunyodkor” moliyaviy muammolar sabab Superliga doirasidagi safar o‘yiniga bormaydi
Jamoada xarajatlarni qoplash uchun mablag‘ mavjud emas.
“Bunyodkor” klubi O‘zbekiston Superligasi 15-turi doirasida “Qizilqum”ga qarshi Navoiyda o‘tkazilishi rejalashtirilgan uchrashuvga bora olmasligini ma’lum qildi. Bu haqda O‘zbekiston Professional futbol ligasi (O‘zPFL) xabar berdi.
Liga ma’lumotiga ko‘ra, klub rasmiy maktubida safarga chiqmaslikka og‘ir moliyaviy ahvol sabab bo‘lganini bildirgan. Qayd etilishicha, jamoada yo‘l chiptalarini xarid qilish, mehmonxonada joylashish hamda delegatsiya a’zolarining ovqatlanish xarajatlarini qoplash uchun mablag‘ mavjud emas.
Avvalroq “Bunyodkor” bosh murabbiyi va bir qator futbolchilar bir necha oydan buyon maosh olmaganini, shuningdek, klub infratuzilmasida ham jiddiy muammolar mavjudligini ma’lum qilgandi.
O‘zPFLning ta’kidlashicha, amaldagi Superliga reglamentiga muvofiq, agar jamoa uzrsiz ravishda uchrashuvga yetib bormasa, unga texnik mag‘lubiyat yoziladi. Shu sababli “Qizilqum” — “Bunyodkor” uchrashuvi bo‘yicha yakuniy qaror reglament asosida qabul qilinadi.
