O‘zbekiston–Qirg‘iziston chegarasidagi nazorat-o‘tkazish punktlari soni ikki barobarga oshiriladi
Qirg‘iziston Prezidenti Sadir Japarov O‘zbekiston bilan davlat chegarasidagi nazorat-o‘tkazish punktlari soni 15 tadan 30 taga yetkazilishini ma’lum qildi.
Qirg‘iziston Prezidenti Sadir Japarov Issiqko‘ldagi “Ruh-Ordo” madaniyat markazida O‘zbekiston Prezidenti Shavkat Mirziyoyev bilan o‘tkazilgan muzokaralar yakunida O‘zbekiston–Qirg‘iziston davlat chegarasidagi nazorat-o‘tkazish punktlari sonini 15 tadan 30 taga oshirish bo‘yicha hujjatlar imzolanganini ma’lum qildi. Bu haqda 24 kg xabar berdi.
Japarovning ta’kidlashicha, mazkur qaror ikki mamlakat fuqarolarining o‘zaro qatnovini yengillashtiradi hamda savdo-iqtisodiy va gumanitar aloqalarni kengaytirishga xizmat qiladi.
“Endi odamlar bir-birinikiga erkin borib kelishi, biznes bilan shug‘ullanishi, ta’lim olishi va dam olishi mumkin”, — dedi Qirg‘iziston rahbari.
U, shuningdek, Qirg‘iziston va O‘zbekiston o‘rtasidagi munosabatlar bugungi kunda o‘z tarixidagi eng yuksak bosqichlardan biriga chiqqanini qayd etdi.
Shavkat Mirziyoyevning davlat tashrifi doirasida ikki mamlakat o‘rtasida davlat chegarasining bir uchastkasi to‘g‘risidagi shartnoma, nazorat-o‘tkazish punktlariga oid bayonnoma, turli sohalardagi hamkorlik bitimlari hamda Ittifoqchilik munosabatlari to‘g‘risidagi shartnoma imzolandi.
Issiqko‘lda Markaziy Osiyo davlatlari va Ozarbayjon rahbarlarining Maslahat uchrashuvi bo‘lib o‘tmoqda. Unda mintaqa davlatlari yetakchilari va Ozarbayjon Prezidenti Ilhom Aliyev ishtirok etmoqda.
