Toshkentdagi “basseyn”larda ommaviy kasallanish haqidagi xabarlar rad etildi
Ijtimoiy tarmoqlarda tarqalayotgan xabarlarga rasmiy munosabat bildirildi.
Toshkent shahridagi cho‘milish havzalarida cho‘milish oqibatida fuqarolar ommaviy kasallanayotgani haqidagi xabarlar o‘z tasdig‘ini topmadi.
Bu haqda Toshkent shahar Sanitariya-epidemiologik osoyishtalik va jamoat salomatligi boshqarmasi rasmiy bayonot berdi.
Ma’lum qilinishicha, poytaxtda faoliyat yuritayotgan 57 ta cho‘milish havzasi boshqarma hamda uning tuman bo‘limlari tomonidan muntazam sanitariya-epidemiologik nazoratga olingan. Tasdiqlangan reja asosida suv namunalari har oy bakteriologik va sanitariya-gigiyenik ko‘rsatkichlar bo‘yicha laboratoriya tekshiruvlaridan o‘tkaziladi.
Joriy yil davomida cho‘milish havzalaridan 1 044 ta suv namunasi tahlil qilingan. Sanitariya talablariga javob bermagan 7 ta mavsumiy cho‘milish havzasida suv to‘liq almashtirilib, yuvish va zararsizlantirish ishlari amalga oshirilgan.
Shuningdek, boshqarma ma’lumotiga ko‘ra, bugungi kungacha cho‘milish havzalarida cho‘milish natijasida zaharlanish yoki yuqumli kasalliklar bilan bog‘liq birorta ham shoshilinch xabarnoma kelib tushmagan.
Shu munosabat bilan ijtimoiy tarmoqlarda tarqalayotgan ommaviy kasallanish haqidagi xabarlar tasdiqlanmagan va haqiqatga to‘g‘ri kelmaydi.
