O‘zbekistonda jaziramaga qaramasdan, yozgi turizmga qiziqish ortmoqda

Yozning jazirama kunlarida ham O‘zbekiston bo‘ylab sayohatlar ommabopligini yo‘qotgani yo‘q. Bunga so‘nggi yillarda basseynli mehmonxonalar, akvaparklar, tog‘ kurortlari va suv havzalari bo‘yidagi zamonaviy dam olish maskanlari sonining ko‘paygani sabab bo‘lmoqda.

 

 

Turizm qo'mitasi ma’lumotlariga ko‘ra, faqat iyun oyining o‘zida mamlakatga 1,2 milliondan ortiq xorijiy sayyoh kelgan. Bu O‘zbekiston yoz mavsumida ham sayohatchilar uchun jozibador yo‘nalish bo‘lib qolayotganini ko‘rsatadi.

 

 

Yozgi dam olish infratuzilmasi eng rivojlangan hududlardan biri Toshkent viloyati bo‘lib, Chorvoq va Bo‘stonliqdagi tog‘ kurortlari, basseynli mehmonxonalar hamda akvaparklar minglab mehmonlarni qabul qilmoqda.

 

 

Samarqand, Buxoro va Xiva shaharlarida tarixiy obidalar bilan bir qatorda zamonaviy mehmonxonalar, basseyn va SPA xizmatlari sayyohlarga taklif etilmoqda. Buxoro viloyatidagi To‘dako‘l suv ombori esa plyaj, qayiq sayrlari va suv sporti turlari bilan ichki turizmning ommabop maskanlaridan biriga aylangan.

 

 

Vodiy viloyatlarida ham yozgi turizm infratuzilmasi kengaymoqda. Namangandagi "Afsonalar vodiysi" majmuasida yirik akvapark va 16 ta basseyn faoliyat yuritayotgan bo‘lsa, Andijon va Farg‘onada zamonaviy akvaparklar hamda basseynli mehmonxonalar sayyohlarga xizmat ko‘rsatmoqda.

 

 

Jizzax viloyatidagi Zomin tog‘ kurortlari va Aydarko‘l bo‘yidagi dam olish maskanlari, shuningdek Navoiydagi Aydarko‘l ko‘llar tizimi ekoturizmning eng mashhur yo‘nalishlari sifatida rivojlanmoqda. Bu hududlarda ko‘l bo‘yida dam olish, qayiq sayrlari, cho‘l safari va o‘tovlarda tunash kabi xizmatlar yo‘lga qo‘yilgan.

 

 

Qashqadaryo, Surxondaryo, Sirdaryo hamda Qoraqalpog‘istonda ham basseynli mehmonxonalar va suv-ko‘ngilochar majmualar soni ortib bormoqda. Nukusdan Orol dengizi va Ustyurt platosiga sayohat qiluvchi sayyohlar uchun ham zamonaviy mehmonxonalar xizmat ko‘rsatmoqda.

 

 

Qayd etilishicha, bugungi kunda O‘zbekistonda yozgi turizm nafaqat tarixiy obidalarni ziyorat qilish, balki tog‘ kurortlari, basseynlar, SPA markazlari va suv attraksionlarida dam olish imkoniyatlari bilan ham boyib bormoqda. Natijada jazirama ob-havo mamlakat bo‘ylab sayohat qilishga bo‘lgan qiziqishni kamaytirayotgani yo‘q.