O‘zbekistonliklar Qirg‘izistonda 15 kungacha ro‘yxatdan o‘tmasdan yurishi mumkin bo‘ladi

O‘zbekiston va Qirg‘iziston fuqarolari endilikda ikki davlat hududiga kirganidan so‘ng 15 kun davomida majburiy ro‘yxatdan o‘tmasdan bo‘lishi mumkin. Tegishli protokol 31-iyul kuni Issiqko‘lda prezidentlar Shavkat Mirziyoyev va Sadir Japarov tomonidan imzolandi.

 

Yangi protokol 2006-yilda imzolangan fuqarolarning o‘zaro qatnovi to‘g‘risidagi ikki tomonlama bitimga qo‘shimcha hisoblanadi. Unga ko‘ra, O‘zbekiston va Qirg‘iziston fuqarolari chegarani kesib o‘tgach, 15 kun davomida qabul qiluvchi davlatning tegishli organlarida doimiy yoki vaqtinchalik ro‘yxatdan o‘tmasdan bo‘lishi mumkin.

 

Amaldagi tartibga ko‘ra, Qirg‘izistonga kirgan O‘zbekiston fuqarolari besh kun ichida ichki ishlar organlarida shaxsan ro‘yxatdan o‘tishi talab etiladi. Yangi kelishuv ushbu muddatni 15 kungacha uzaytirib, ro‘yxatdan o‘tish majburiyatini bekor qiladi.

 

Shuningdek, Cho‘lponotada o‘tayotgan Markaziy Osiyo davlatlari va Ozarbayjon rahbarlarining norasmiy maslahat uchrashuvida Qirg‘iziston prezidenti Sadir Japarov mintaqa uchun yagona turistik viza joriy etish tashabbusini yana ilgari surdi.

 

Uning aytishicha, O‘zbekiston va Qozog‘iston ushbu g‘oyani qo‘llab-quvvatlagan. Tashabbus Markaziy Osiyo mamlakatlariga sayohat qiluvchi xorijiy fuqarolar uchun Shengen vizasiga o‘xshash yagona viza tizimini yaratishni nazarda tutadi.

 

30-iyuldan 1-avgustgacha davom etayotgan uchrashuvda O‘zbekiston prezidenti Shavkat Mirziyoyev, Qirg‘iziston prezidenti Sadir Japarov, Qozog‘iston prezidenti Qosim-Jo‘mart To‘qayev, Tojikiston prezidenti Emomali Rahmon, Turkmaniston prezidenti Serdar Berdimuhamedov hamda Ozarbayjon prezidenti Ilhom Aliyev ishtirok etmoqda.

 

Sammit davomida savdo, energetika, transport koridorlari, turizm, madaniy-gumanitar hamkorlik va mintaqaviy xavfsizlik masalalari muhokama qilinmoqda.