Qrimda elektr uzilishlari ortidan aholi issiq ovqat uchun navbatga turmoqda
Massandra shahrida elektrsiz qolgan aholiga har kuni yuzlab porsiya issiq ovqat tarqatilmoqda.
Rossiya tomonidan anneksiya qilingan Qrim yarimorolida elektr ta’minotidagi uzilishlar sabab aholi issiq ovqat olish uchun ko‘chalarda tashkil etilgan tarqatish punktlariga murojaat qilmoqda. Bu haqda Reuters xabar berdi.
Qrimning Massandra shahrida mahalliy hokimiyat elektr energiyasi uzilgani tufayli uyida ovqat tayyorlay olmayotgan fuqarolar uchun dala oshxonasini tashkil qilgan. Shahar ma’muriyati rahbari Oksana Madyudning aytishicha, bu yerda har kuni qariyb 200 kishiga grechka va konservalangan go‘shtdan tayyorlangan issiq taom tarqatilmoqda.
Mahalliy aholi vakillarining so‘zlariga ko‘ra, elektr ta’minotidagi uzilishlar ularni gaz plitalari va ballonlar izlashga majbur qilgan. Ayrim hududlarda elektr energiyasi 10 kungacha uzilib qolgan.
Rossiya 2014-yilda anneksiya qilgan Qrim yoz davomida Ukraina tomonidan elektr stansiyalari va boshqa muhim infratuzilma obyektlariga uyushtirilgan zarbalar oqibatida yoqilg‘i va elektr ta’minoti bilan bog‘liq muammolarga duch kelmoqda.
Ukraina esa Rossiya hududi va Moskva nazoratidagi hududlarga uzoq masofali zarbalarni kuchaytirayotganini bildirib, buni mamlakatiga qarshi olib borilayotgan urushga javob chorasi sifatida izohlamoqda.
