UEFA Janni Infantinoni FIFA prezidenti lavozimidan chetlatmoqchi

Yevropa futbol uyushmalari ittifoqi (UEFA) FIFA prezidenti Janni Infantinoning Jahon chempionati daromadlarini boshqarish uchun 20 milliard dollarlik xususiy investitsiya kompaniyasi tashkil etish rejasidan voz kechilganidan so‘ng keskin bayonot bilan chiqdi. Bu haqda AP xabar berdi.

 

UEFA bayonotida FIFAning amaldagi rahbariyati nafaqat Yevropa futboli, balki xalqaro futbol hamjamiyatining ko‘plab a’zolari ishonchini yo‘qotgani ta’kidlandi.

 

Tashkilotga ko‘ra, futbol taqdiriga ta’sir qiluvchi muhim qarorlar yashirin tarzda va shoshilinch ravishda tayyorlanmasligi kerak. UEFA ushbu tashabbus qanday paydo bo‘lganini aniqlash, unga mas’ul shaxslarni javobgarlikka tortish hamda kelgusida bunday holatlar takrorlanishining oldini olish bo‘yicha boshqa konfederatsiyalar bilan hamkorlik qilishini bildirdi.

 

Shu bilan birga, The Telegraph nashrining yozishicha, agar Janni Infantino lavozimini ixtiyoriy ravishda tark etmasa, UEFA unga nisbatan ishonchsizlik votumi o‘tkazish tashabbusini ilgari surishga tayyor. Nashr ma’lumotiga ko‘ra, UEFAga a’zo barcha 55 milliy assotsiatsiya bunday tashabbusni qo‘llab-quvvatlashga tayyor. Bunday ovoz berish jarayonini boshlash uchun esa UEFA nizomiga ko‘ra, kamida 43 a’zo assotsiatsiyaning roziligi kifoya qiladi.

 

Infantino seshanba kuni FIFAning tijorat faoliyatini, jumladan erkaklar va ayollar o‘rtasidagi Jahon chempionatlari hamda Klublar o‘rtasidagi Jahon chempionatlarini 20 milliard dollarlik yangi sho‘ba kompaniyaga ajratish va uning 20 foiz ulushini xususiy investorlarga sotishni taklif qilgan edi.

 

Biroq reja bir necha kun ichida kuchli qarshilikka uchradi. UEFAga a’zo 55 mamlakat ushbu tashabbusga norozilik bildirib, FIFA musobaqalarini boykot qilish masalasini ko‘rib chiqishga kelishib oldi. Keyinchalik Shimoliy va Markaziy Amerika hamda Karib havzasi futbol konfederatsiyasi (CONCACAF), shuningdek Osiyo futbol konfederatsiyasi ham rejani qo‘llab-quvvatlamasligini e’lon qildi.

 

Qarshiliklar FIFA ichida ham kuzatildi. Tashkilot prezidentining katta maslahatchisi Karlos Kordeiro iste’foga chiqdi va boshqa yuqori lavozimli xodimlarni ham o‘z pozitsiyasini ochiq bildirishga chaqirdi.

 

Shundan so‘ng FIFA bosh operatsion direktori Kevin Lamur loyiha tashkilot ichida yetarlicha muhokama qilinmagani va xodimlar reja yuzasidan to‘liq xabardor qilinmaganini bildirib, tashabbus amalga oshirilmasligi kerakligini ma’lum qildi.

 

Natijada FIFA shanba kuni Jahon chempionati tijorat huquqlarini xususiy investorlarga topshirish rejasini rasman bekor qildi.

 

Norvegiya futbol federatsiyasi prezidenti va UEFA Ijroiya qo‘mitasi a’zosi Lise Klaveness ushbu voqea xalqaro futbol boshqaruvi tizimiga putur yetkazganini bildirib, nazorat mexanizmlarini kuchaytirish zarurligini ta’kidladi.

 

Osiyo futbol konfederatsiyasi prezidenti Shayx Salmon bin Ibrohim Al-Xalifa esa jahon futboliga oid muhim qarorlar faqat keng maslahatlashuvlar, jamoaviy muloqot va amaldagi boshqaruv tamoyillariga rioya qilingan holda qabul qilinishi lozimligini bildirdi.

 

Bu Janni Infantinoning so‘nggi yillarda bekor qilingan navbatdagi yirik tashabbusi bo‘ldi. Avvalroq u 2018-yilda yangi xalqaro musobaqalarni tashkil etish bo‘yicha 25 milliard dollarlik loyiha hamda 2021-yilda Jahon chempionatini har ikki yilda bir marta o‘tkazish g‘oyasini ilgari surgan, biroq har ikkala tashabbus ham futbol hamjamiyatining keskin qarshiligidan so‘ng amalga oshmay qolgan.

 

FIFA nizomiga ko‘ra, Infantino yana bir to‘rt yillik muddatga prezidentlik uchun nomzodini qo‘yish huquqiga ega. Navbatdagi prezidentlik saylovi 2027-yil mart oyida Marokashning Rabot shahrida bo‘lib o‘tadi, nomzodlarni ro‘yxatga olish muddati esa 2026-yil 18-noyabrda yakunlanadi.