Nyu-Yorkda davosi va vaksinasi mavjud bo‘lmagan Burbon virusi bilan bog‘liq ilk holat qayd etildi
Olimlar "yolg'iz yulduz" kanasi orqali yuqadigan va maxsus davosi mavjud bo‘lmagan virus kutilganidan kengroq tarqalgan bo‘lishi mumkinligidan ogohlantirdi.
AQSHning Nyu-York shtatida kana orqali yuqadigan kam uchraydigan Burbon virusi bilan kasallanishning ilk holati tasdiqlandi. Bu haqda Fox News xabar berdi.
Mutaxassislar virusga chalingan boshqa bemorlar ham bo‘lishi mumkin, biroq tashxis qo‘yish qiyinligi sababli ular aniqlanmay qolayotganidan ogohlantirmoqda. Stony Brook Medicine olimlari virusni Long-Aylendda yashovchi bemorda aniqlagan. Og‘ir ahvolda shifoxonaga yotqizilgan bemorda o‘tkazilgan laboratoriya tekshiruvlari Burbon virusini tasdiqlagan.
Mutaxassislarga ko‘ra, virus "yolg'iz yulduz" kanasi orqali yuqadi. Kasallikning asosiy alomatlari orasida yuqori harorat, holsizlik, toshma, bosh va mushak-og‘riqlari hamda ko‘ngil aynishi bor. Hozircha Burbon virusiga qarshi na vaksina, na maxsus davolash usuli mavjud.
Shifokorlarning ta’kidlashicha, kasallik belgilari kana orqali yuqadigan boshqa infeksiyalarga o‘xshash bo‘lgani, shuningdek, Burbon virusini aniqlash uchun keng qo‘llaniladigan diagnostik test yo‘qligi sababli ko‘plab holatlar e’tibordan chetda qolishi mumkin.
Burbon virusi ilk bor 2014-yilda AQSHning Kanzas shtatida aniqlangan. O‘shandan buyon dunyo bo‘yicha atigi olti holat rasman qayd etilgan. Virus kamida ikki kishining o‘limi bilan bog‘langan, biroq olimlar haqiqiy kasallanish holatlari bundan ko‘proq bo‘lishi mumkinligini aytmoqda.
AQSH Kasalliklarni nazorat qilish va oldini olish markazi (CDC) ma’lumotlariga ko‘ra, Lone Star kanasi mamlakatning shimoli-sharqiy, janubiy va markaziy hududlarida keng tarqalgan. Shu bois mutaxassislar fuqarolarga tabiat qo‘ynida ehtiyot choralariga amal qilish, kana chaqqanidan keyin isitma yoki boshqa alomatlar kuzatilsa, shifokorga murojaat qilishni tavsiya etmoqda.
