Toshkentda 1-avgust — Ozarbayjon Alifbosi va Ozarbayjon Tili kuni nishonlandi
Tadbir davomida Ozarbayjon alifbosining tarixiy taraqqiyot yo‘li, tilning xalq milliy o‘zligi va ma’naviy merosini asrab-avaylashdagi beqiyos o‘rni haqida batafsil ma’lumot berildi.
O‘zbekistondagi Haydar Aliyev nomidagi Ozarbayjon Madaniyat Markazida 1-avgust — Ozarbayjon Alifbosi va Ozarbayjon Tili kuni munosabati bilan tadbir o‘tkazildi.
Tadbir davomida Ozarbayjon alifbosining tarixiy taraqqiyot yo‘li, ona tilining xalq milliy o‘zligi va ma’naviy merosini asrab-avaylashdagi beqiyos o‘rni haqida batafsil ma’lumot berildi. Ozarbayjon Respublikasi Prezidenti janob Ilhom Aliyev Ozarbayjon tilini muhofaza qilish, uning sofligini ta’minlash hamda qo‘llanish imkoniyatlarini kengaytirishga doimo alohida e’tibor qaratayotgani ta’kidlandi. Shu munosabat bilan davlat rahbarining: “Bugungi kunda 50 milliondan ortiq inson uchun Ozarbayjon tili ona tilidir. Sof, musaffo va adabiy Ozarbayjon tilining himoyachisi biz — mustaqil Ozarbayjon davlatimiz”, — degan so‘zlari alohida qayd etildi. Prezident Ilhom Aliyev rahbarligida Ozarbayjon tilini rivojlantirish, uning qo‘llanish doirasini kengaytirish va xalqaro miqyosda targ‘ib etish yo‘nalishida izchil hamda maqsadli chora-tadbirlar amalga oshirilayotgani bildirildi.
Ozarbayjon Madaniyat Markazida faoliyat yuritayotgan Ozarbayjon tili kurslari tinglovchilari tilning boyligi, milliy qadriyatlarni asrab-avaylashdagi o‘rni hamda ona tiliga sadoqatning ahamiyati haqida o‘z fikr-mulohazalarini bildirdilar. Dastur doirasida 1-avgust — Ozarbayjon Alifbosi va Ozarbayjon Tili kuniga bag‘ishlangan videolavha ishtirokchilar e’tiboriga havola etildi.
Tadbir yakunida Markaz faoliyatiga yangi jalb etilgan yoshlar uchun tanishtiruv ekskursiyasi tashkil qilindi. Ishtirokchilar Markazda faoliyat yuritayotgan muzeylar va kutubxona bilan tanishib, ekspozitsiyalar, eksponatlar hamda kutubxona fondi haqida batafsil ma’lumot oldilar.
