Toshkentda “kvartiralar banki” tashkil etiladi
Renovatsiya hududidagi mulkdorlarga kompensatsiya sifatida yoki vaqtincha yashash uchun uy-joylar taqdim etiladi.
Toshkent shahrida renovatsiya hududidagi mulkdorlarga kompensatsiya va vaqtincha yashash uchun uy-joy ajratishni ta’minlaydigan “kvartiralar banki” tashkil etiladi. Bu Prezidentning “Toshkent shahrini 2026–2027-yillarda ijtimoiy-iqtisodiy rivojlantirish bo‘yicha qo‘shimcha chora-tadbirlar to‘g‘risida”gi qarorida belgilangan.
Hujjatga ko‘ra, mazkur tizim renovatsiya loyihalarini samarali amalga oshirish hamda mulkdorlarning huquqlarini himoya qilish maqsadida 2031-yil 1-yanvarga qadar eksperiment tariqasida Tashkent Invest kompaniyasi tomonidan shakllantiriladi.
“Kvartiralar banki” uchun turar va noturar joylar taklif so‘rovi asosida xarid qilinadi. Ushbu uy-joylardan renovatsiya hududidagi mulkdorlarga kompensatsiya sifatida yoki vaqtincha ijara uchun foydalaniladi. Ularni taqsimlash tartibi Xalq deputatlari Toshkent shahar kengashi tomonidan tasdiqlanadi.
Qarorga muvofiq, Tashkent Invest “kvartiralar banki”ni shakllantirishda Toshkent shahrini rivojlantirish jamg‘armasi mablag‘lari hamda qonunchilikda taqiqlanmagan boshqa manbalardan foydalanishi mumkin.
Shuningdek, renovatsiya hududlaridagi davlat mulki hisoblangan ko‘chmas mulklar utilizatsiya qiymati bo‘yicha kompaniya tasarrufiga o‘tkaziladi. Davlat ishtirokidagi korxonalarga tegishli ko‘chmas mulklar esa mustaqil baholash asosida uch yil davomida bo‘lib-bo‘lib to‘lash sharti bilan sotiladi.
Bundan tashqari, kompaniyaga investorlar va pudrat tashkilotlarini jalb qilgan holda Toshkent shahrini rivojlantirish jamg‘armasi mablag‘lari hisobidan obyektlarni qurish yoki rekonstruksiya qilish hamda ularni elektron onlayn auksion orqali sotish huquqi beriladi. Renovatsiya doirasidagi tayyor biznes loyihalari uchun pudrat tashkilotlari belgilangan tartibda tanlab olinadi.
Mazkur qarorda yana bir qator yangiliklar ham nazarda tutilgan. Jumladan, Toshkent shahridagi maydoni 5 ming kvadrat metrdan ortiq savdo markazlarida kitob do‘konlarini tashkil etish majburiy etib belgilanadi, Suv resurslarini boshqarish markazi tashkil qilinadi, shuningdek, poytaxtdagi 35 ta bozor va savdo majmuasi hamda ularning filiallari ommaviy savdolarga chiqariladi.
