AQSHdagi o‘rmon yong‘inlaridan jabrlanganlar orasida o‘zbekistonliklar yo‘q
Yong‘inlar fonida Bosh konsulxona vatandoshlarga murojaat qildi.
O‘zbekistonning Sietldagi Bosh konsulxonasi AQSHning Vashington shtatida yuz berayotgan yirik o‘rmon yong‘inlari oqibatida jabrlanganlar orasida O‘zbekiston fuqarolari yo‘qligini ma’lum qildi.
Ma’lum qilinishicha, Vashington shtatining Spokan shahri va uning atrofidagi hududlarda kuzatilayotgan yong‘inlar sabab qariyb 60 ming nafar aholini evakuatsiya qilish bo‘yicha ko‘rsatma berilgan.
Reuters agentligi ma’lumotiga ko‘ra, yong‘inlar oqibatida 600 ta bino, jumladan turar joylar va korxonalar vayron bo‘lgan. Hozirga qadar 250 ming akrdan ortiq (101 ming gektardan ziyod) hudud yong‘in bilan qamrab olingan.
Spokan yong‘in xavfsizligi xizmati boshlig‘i Tom Uilyamsning aytishicha, hududdagi uchta alohida yong‘in o‘chog‘i evakuatsiya e’lon qilingan tumanlar uchun jiddiy xavf tug‘dirmoqda. Yong‘inni bartaraf etish ishlariga Milliy gvardiya bilan bir qatorda AQSHning o‘ndan ortiq shtatlaridan jalb etilgan o‘t o‘chiruvchilar ham safarbar etilgan.
O‘zbekistonning Sietldagi Bosh konsulxonasi hozirgi kunga qadar yong‘inlardan jabrlangan yoki zarar ko‘rgan O‘zbekiston fuqarolari haqida ma’lumot kelib tushmaganini bildirdi.
Shuningdek, diplomatik vakolatxona AQSHning yong‘in kuzatilayotgan hududlarida istiqomat qilayotgan vatandoshlardan mahalliy hokimiyat organlari ko‘rsatmalariga qat’iy amal qilishni, xavfsizlik choralariga rioya etishni hamda zarurat tug‘ilganda Bosh konsulxona bilan bog‘lanishni so‘radi.
