Farg‘onada mast haydovchi urib ketgan YPX xodimi vafot etdi
“Spark” boshqargan haydovchi YPX xodimining to‘xtash haqidagi qonuniy talabiga bo‘ysunmay, uni urib yuborgan.
Farg‘ona viloyatining O‘zbekiston tumanida xizmat vazifasini bajarayotgan YPX xodimi mast haydovchi boshqaruvidagi avtomobil urib ketishi oqibatida halok bo‘ldi.
Viloyat Yo‘l harakati xavfsizligi boshqarmasi ma’lumotiga ko‘ra, yo‘l-transport hodisasi 31-iyul kuni soat taxminan 23:30 da O‘zbekiston tumani “O‘qchi” MFY hududidan o‘tuvchi 40V064 avtomobil yo‘lining 20-kilometrida sodir bo‘lgan.
Dastlabki ma’lumotlarga ko‘ra, 1996-yilda tug‘ilgan A. E. mast holda “Spark” rusumli avtomobilni boshqarib ketayotib, tungi xizmatni olib borayotgan Farg‘ona viloyati IIB Jamoat xavfsizligi xizmati Yo‘l harakati xavfsizligi boshqarmasi 2-mintaqaviy hudud YPX otryadi 3-safarbar guruhi katta inspektori, serjant Xayitbek Karimjonovning to‘xtash haqidagi qonuniy talabiga bo‘ysunmagan va uni urib yuborgan.
Oqibatda serjant Xayitbek Karimjonov og‘ir tan jarohatlari bilan shifoxonaga olib borilgan. Shifokorlar tomonidan ko‘rsatilgan barcha tibbiy muolajalarga qaramay, u jonlantirish bo‘limida vafot etgan.
Ma’lum qilinishicha, Xayitbek Karimjonov 2022-yildan buyon ichki ishlar organlarida xizmat qilgan. Uning ortidan onasi, turmush o‘rtog‘i hamda ikki nafar farzandi qoldi.
Holat yuzasidan tegishli tartibda tergov harakatlari olib borilmoqda.
