Mustaqillik bayrami oldidan O‘zbekistonda "Dolzarb 40 kun" tozalik tadbirlari boshlandi
Tadbir doirasida hududlarda obodonlashtirish, sanitariya-tozalash va chiqindilarni boshqarish bo‘yicha ishlar amalga oshirilmoqda.
O‘zbekistonda Mustaqillikning 35 yilligi munosabati bilan 28-iyuldan 6-sentyabrga qadar respublika bo‘ylab "Dolzarb 40 kun" ekologik tadbirlari o‘tkazilmoqda. Bu davrda hududlarda obodonlashtirish, sanitariya-tozalash ishlari va chiqindilarni boshqarish bo‘yicha keng ko‘lamli tadbirlar amalga oshiriladi.
Ekologiya va iqlim o‘zgarishi milliy qo‘mitasi ma’lum qilishicha, tadbirlarning asosiy maqsadi sanitariya-tozalash ishlarini kuchaytirish, chiqindilarni boshqarish tizimini takomillashtirish hamda aholining ekologik madaniyatini yuksaltirishdan iborat.
Tasdiqlangan reja asosida Qo‘mita huzuridagi Chiqindilarni boshqarish va sirkulyar iqtisodiyotni rivojlantirish agentligi, uning hududiy boshqarmalari hamda "Chiqindi poligonlarini boshqarish direksiyasi" davlat muassasasi tomonidan respublika bo‘ylab amaliy tadbirlar tashkil etilmoqda.
Tadbirlarni muvofiqlashtirish maqsadida Agentlik va uning hududiy tuzilmalarida maxsus shtablar tuzilgan. Har bir hududga mas’ul xodimlar biriktirilib, navbatchilik tizimi joriy etilgan hamda amalga oshirilayotgan ishlar ustidan kunlik monitoring yo‘lga qo‘yilgan.
Qayd etilishicha, "Dolzarb 40 kun" tadbirlari Prezidentning 2026-yil 1-apreldagi PQ-120-son qarori ijrosini ta’minlash doirasida o‘tkazilmoqda. Amalga oshirilayotgan ishlar haqidagi ma’lumotlar har kuni Agentlikka taqdim etilib, respublika miqyosida umumlashtiriladi.
Ekologiya va iqlim o‘zgarishi milliy qo‘mitasi davlat organlari, korxona va tashkilotlar, tadbirkorlik subyektlari hamda fuqarolarni ekologik tadbirlarda faol ishtirok etishga, aholi punktlarini obodonlashtirish va atrof-muhitni asrashga hissa qo‘shishga chaqirdi.
