Toshkentda noqonuniy dori savdosi bilan shug‘ullangan oila fosh etildi
Ular dori vositalarini Rossiyadan yo‘lovchilar ko‘magida kichik partiyalarda temiryo‘l va samolyot orqali olib kelib, Toshkentda sotish bilan shug‘ullangan.
Davlat xavfsizlik xizmati va Bojxona qo‘mitasi xodimlari hamkorligida o‘tkazilgan tezkor tadbirda Rossiyadan noqonuniy olib kirilgan kontrafakt dori vositalari savdosiga chek qo‘yildi. Bu haqda DXX xabar berdi.
Tezkor tadbir davomida Toshkent shahrining Yangihayot tumanida yashovchi 1963-yilda tug‘ilgan fuqaro hamda uning ikki nafar farzandiga tegishli Toshkent shahri va Toshkent viloyatida joylashgan uchta xonadon ko‘zdan kechirilgan.
Tekshiruv jarayonida ushbu manzillardan “Buserelin”, “Volini”, “Bikana”, “Tirzetta” va boshqa nomdagi jami 29 turdagi 1330 quti kontrafakt dori vositalari aniqlanib, protsessual tartibda rasmiylashtirilgan.
Dastlabki hisob-kitoblarga ko‘ra, musodara qilingan mahsulotlarning umumiy qiymati taxminan 600 million so‘mni tashkil etadi.
Aniqlanishicha, mazkur oila a’zolari dori vositalarini Rossiya Federatsiyasidan yo‘lovchilar yordamida kichik partiyalarda temir yo‘l va havo transporti orqali noqonuniy olib kirib, ularni Toshkent shahrida sotish bilan shug‘ullanib kelgan.
Hozirda musodara qilingan dori vositalari yuzasidan ekspertiza tayinlangan, holat bo‘yicha surishtiruv ishlari davom ettirilmoqda.
