“Alloh yaratgan har bir mavjudotning qadri bor” — Saida Mirziyoyeva
Prezident administratsiyasi rahbari hayvonlarga nisbatan shafqatsiz munosabatda bo‘lganlarga jazo kuchaytirilganini eslatib o'tdi.
Saida Mirziyoyeva hayvonlarga nisbatan shafqatsiz munosabat uchun javobgarlik kuchaytirilganini eslatib, jamiyatda zo‘ravonlikka murosasiz munosabatni shakllantirish muhimligini ta’kidladi.
Prezident administratsiyasi rahbarining qayd etishicha, joriy yilning 28-iyunidan boshlab hayvonlarga shafqatsiz munosabatda bo‘lgan shaxslarga nisbatan yanada qat’iy jazo choralarini nazarda tutuvchi qonunchilik normalari kuchga kirgan.
Yangi tartibga ko‘ra, bunday huquqbuzarliklar uchun ma’muriy jarimalar ikki baravar oshirilgan. Shuningdek, huquqbuzarlarga nisbatan 15 sutkagacha ma’muriy qamoq jazosi qo‘llanishi mumkin.
Bundan tashqari, hayvonlarga nisbatan shafqatsizlikni takror sodir etgan shaxslar jinoiy javobgarlikka tortilishi va ozodlikdan mahrum etilishi ham nazarda tutilgan.
Saida Mirziyoyeva bunday qonunlar faqat aybdorlarni jazolash uchun emas, balki jamiyatda ustuvor qadriyatlarni mustahkamlashga xizmat qilishini ta’kidlagan.
Uning fikricha, jamiyatda xavfsiz va sog‘lom muhitni shakllantirish uchun zo‘ravonlikning har qanday ko‘rinishiga murosasiz munosabatda bo‘lish zarur. Shuningdek, har bir tirik mavjudotning qadri borligi, ularga nisbatan mehr-oqibat va mas’uliyat hissini shakllantirish muhimligi qayd etilgan.
Saida Mirziyoyeva bu borada ota-onalarning o‘rni alohida ekanini ta’kidlab, farzandlarga bolalikdan ojizlarga ozor yetkazmaslik, kuchni shafqatsizlik orqali namoyon etish noto‘g‘ri ekanini singdirish zarurligini bildirgan.
