Andijon va Qashqadaryoda pora olayotgan mansabdorlar ushlandi
Mansabdorlar fuqarolarning masalasini ijobiy hal qilib berish evaziga minglab dollar talab qilgan.
Andijon viloyatida "Andijon suv ta'minoti" AJning tuman filiallaridan birining boshlig‘i o‘z xizmat mavqeidan foydalanib, mansabdor tanishlari orqali fuqaroning yangi qurilgan xonadoniga oqava suv tarmog‘i tortish va kanalizatsiya nasosini o‘rnatish uchun ruxsat olib berishni va'da qilgan. Buning evaziga u 1983-yilda tug‘ilgan fuqarodan 8,5 ming AQSH dollari talab qilgan.
Davlat xavfsizlik xizmati, Bosh prokuratura huzuridagi Departament va Ichki ishlar organlari xodimlari hamkorligida o‘tkazilgan tezkor tadbirda ushbu mansabdor so‘ralgan pul mablag‘ini uchinchi shaxs orqali olgan vaqtida uning noqonuniy harakatiga chek qo‘yilgan.
Qashqadaryo viloyatida aniqlangan yana bir holatda esa OITSga qarshi kurashish markazining tumanlardan biridagi OIV diagnostika laboratoriyasi laboranti fuqaroga nisbatan tayinlangan ekspertiza xulosasini mansabdor tanishlari orqali uning foydasiga ijobiy hal qilib berishni va'da qilgan. Ushbu xizmat evaziga u 3 ming AQSH dollari olgan vaqtida Davlat xavfsizlik xizmati va Bosh prokuratura huzuridagi Departament xodimlari tomonidan ashyoviy dalillar bilan ushlangan.
Shundan so‘ng tezkor tadbir davom ettirilib, laborantdan 2,5 ming AQSH dollarini olgan vaqtida Respublika sud-tibbiy ekspertiza ilmiy-amaliy markazining tuman bo‘limi boshlig‘i ham qo‘lga olingan.
Har ikki holat yuzasidan aybdorlarga nisbatan jinoyat ishlari qo‘zg‘atilib, tergov harakatlari olib borilmoqda
