Gaz yetib bormagan hududlarda elektr energiyasi uchun chegirma berilishi mumkin
Energetika vaziriga ko‘ra, bu bo‘yicha hududlarning xususiyatlari va energoresurslar bilan ta’minlanganlik darajasini hisobga olgan holda yangi tariflash tizimi ishlab chiqilmoqda.
O‘zbekistonda tabiiy gaz ta’minoti mavjud bo‘lmagan hududlarda yashovchi aholi uchun elektr energiyasi tariflarini differensiallashtirish rejalashtirilmoqda. Bu haqda energetika vaziri Sherzod Xodjayev “O‘zbekiston 24” telekanaliga bergan intervyusida ma’lum qildi.
Vazirning aytishicha, ayni paytda mamlakatda qariyb 2 mingta mahallaga tabiiy gaz yetkazib berilmagan. Shu sababli mazkur hududlardagi aholi uylarini elektr energiyasi orqali isitmoqda, ammo amaldagi tariflar bo‘yicha to‘lov qilayotgani qayd etildi.
Sherzod Xodjayevning so‘zlariga ko‘ra, Prezident topshirig‘iga asosan elektr energiyasi uchun tarif siyosatini hududlarning o‘ziga xos xususiyatlaridan kelib chiqqan holda qayta ko‘rib chiqish rejalashtirilgan. Yangi tizimda ko‘p qavatli va yakka tartibdagi uy-joylar, shuningdek, aholi yashash hududlarining gaz va boshqa energoresurslar bilan ta’minlanganlik darajasi inobatga olinadi.
“Tabiiy gaz yetib bormagani uchun isitishda elektr energiyasidan foydalanayotgan iste’molchining chegirma olishga haqqi bor”, — dedi vazir.
Ma’lumot uchun, gaz ta’minoti mavjud bo‘lmagan uylar uchun elektr energiyasi tariflariga yengillik berish tashabbusi avval ham bildirilgan. Sobiq energetika vaziri Jo‘rabek Mirzamahmudov 2024 yil kuzida bu bo‘yicha qaror loyihasi ishlab chiqilayotganini va uni 2025 yildan joriy etish rejalashtirilganini ma’lum qilgan edi.
