O‘zbekistonda tug‘ilgan Rustem Umerov Ukraina Tashqi razvedka xizmatiga rahbar bo‘ldi
U Samarqand viloyatining Bulung‘ur tumanida qrim-tatar oilasida tug‘ilgan.
Ukraina prezidenti Vladimir Zelenskiy O‘zbekistonda tug‘ilgan Rustem Umerovni Ukraina Tashqi razvedka xizmati rahbari etib tayinladi.
Rustem Umerov bungacha Ukraina Milliy xavfsizlik va mudofaa kengashi kotibi lavozimida faoliyat yuritgan. Yangi lavozimda u mamlakatning razvedka faoliyatini boshqarish bilan birga, xalqaro hamkorlar bilan mudofaa va xavfsizlik sohasidagi muzokaralarni ham muvofiqlashtiradi.
Prezident Zelenskiyning ta’kidlashicha, Umerov “Dronlar bitimi” tashabbusi doirasidagi hamkorlikni davom ettiradi. Mazkur tashabbus orqali Ukraina mudofaa sanoati uchun uzoq muddatli moliyalashtirishni ta’minlash va hamkor davlatlar bilan zamonaviy mudofaa texnologiyalari bo‘yicha hamkorlikni kengaytirish rejalashtirilgan.
Ma’lum qilinishicha, hozirgacha ushbu loyiha bo‘yicha to‘qqizta davlat bilan kelishuv imzolangan, yana 15 ta davlat bilan muzokaralar davom etmoqda.
Rustem Umerov 1982-yilda Samarqand viloyatining Bulung‘ur tumanida qrim-tatar oilasida tug‘ilgan. U avval Rossiya-Ukraina urushi bo‘yicha xalqaro muzokaralarda faol ishtirok etgan hamda AQSH va boshqa hamkor davlatlar bilan olib borilgan muzokaralarda Ukraina delegatsiyasiga rahbarlik qilgan.
