Qashqadaryoda erkak xotinini ayovsiz kaltakladi
Himoya orderi rasmiylashtirilganiga qaramay, erkak turmush o‘rtog‘iga tan jarohati yetkazgan.
Qashqadaryo viloyati Ichki ishlar boshqarmasi ijtimoiy tarmoqlarda tarqalgan holat yuzasidan rasmiy munosabat bildirdi.
Ma’lum qilinishicha, Qarshi shahrining “Cho‘lquvar” mahallasida vaqtincha yashab kelgan er-xotin o‘rtasida avvaldan muntazam oilaviy kelishmovchiliklar kuzatilgan.
Shu sababli mahalla yettiligi tomonidan oiladagi huquqbuzarliklarning oldini olish maqsadida profilaktik choralar ko‘rilib, ayolga nisbatan himoya orderi rasmiylashtirilgan, shuningdek, ular istiqomat qilayotgan xonadonga qo‘riqlash signalizatsiyasi o‘rnatilgan.
Biroq olib borilgan profilaktik suhbat va ogohlantirishlarga qaramay, 26-iyun kuni soat taxminan 23:00 da er-xotin o‘rtasida yana janjal kelib chiqqan. Oqibatda erkak turmush o‘rtog‘ini urib, unga tan jarohati yetkazgan.
Mazkur holat yuzasidan Qarshi shahar IIB Tergov bo‘limi tomonidan Jinoyat kodeksining 126-moddasi bilan jinoyat ishi qo‘zg‘atilgan. Hozirda ushbu ish bo‘yicha tergov harakatlari davom ettirilmoqda.
