Olimlar yer aholisi ikki baravarga qisqartirishni taklif qildi
Tadqiqotchilar fikricha, tabiiy resurslar tanqisligining oldini olish uchun 2200-yilgacha dunyo aholisini bosqichma-bosqich kamaytirish zarur.
Xalqaro olimlar guruhi Yer aholisi sonini 2200-yilga qadar bosqichma-bosqich ikki baravarga, ya’ni taxminan 4 milliard kishigacha kamaytirish taklifini ilgari surdi. Bu haqdagi tadqiqot Sustainable Development ilmiy jurnalida e’lon qilindi.
Tadqiqot mualliflarining ta’kidlashicha, so‘nggi bir asrda dunyo aholisi 2 milliarddan kam ko‘rsatkichdan 8,3 milliard nafarga yetgan va bunday o‘sish tabiiy resurslarga bosimni keskin kuchaytirgan.
Olimlar taklif qilayotgan yondashuv majburiy choralarni emas, balki oilani rejalashtirish imkoniyatlarini kengaytirish, ayniqsa kam daromadli mamlakatlarda ayollarning reproduktiv salomatlik xizmatlaridan foydalanishini yaxshilash orqali tug‘ilish sur’atlarini tabiiy ravishda pasaytirishni nazarda tutadi.
Tadqiqotchilar fikricha, insoniyatning sayyoraga umumiy ta’siri har bir insonning atrof-muhitga ko‘rsatadigan ta’siri hamda Yer aholisi soni ko‘paytmasi bilan belgilanadi. Shu bois, global aholi sonining ortib borishi ekologik va resurslar bilan bog‘liq muammolarni yanada kuchaytirayotgani qayd etilgan. Mutaxassislar prognoziga ko‘ra, agar mavjud tendensiya saqlanib qolsa, 2100-yilga borib Yer aholisi soni 11,4 milliard nafarga yetishi mumkin.
Tadqiqotda keltirilishicha, so‘nggi 50 yil davomida atmosferaga chiqarilgan karbonat angidrid (CO₂) hajmi ikki baravardan ko‘proqqa oshgan. Shu davrda global biologik xilma-xillik ikki baravardan ortiq qisqargan, energiya iste’moli esa qariyb uch baravar ko‘paygan. Bundan tashqari, tabiiy resurslarni qazib olish va pestitsidlardan foydalanish hajmi ham to‘rt baravardan ko‘proqqa oshgani qayd etilgan. Mutaxassislar ushbu omillar sayyora resurslariga bosimni yanada kuchaytirayotganini ta’kidlagan.
Tadqiqot mualliflari bunday yondashuv tabiiy ekotizimlarni tiklash, biologik xilma-xillikni saqlash, issiqxona gazlari chiqindilarini kamaytirish, resurslar uchun raqobatni yumshatish hamda global qashshoqlikni qisqartirishga xizmat qilishi mumkinligini qayd etgan.
