Rossiya bayrog‘i tushirilgan poyandoz ishi: o‘zbekistonlik ayolga jinoyat ishi qo‘zg‘atish rad etildi
Qozondagi Bosh konsulxona ma’lum qilishicha, bunga Rossiya vakolatli idoralari bilan olib borilgan muzokaralar natijasida erishilgan.
Rossiyaning Nijniy Novgorod viloyatida Rossiya davlat bayrog‘i tasviri tushirilgan poyandoz bilan bog‘liq holatda tekshirilgan O‘zbekiston fuqarosi M.S.ga nisbatan jinoyat ishi qo‘zg‘atilmaydi. Bu haqda O‘zbekistonning Qozon shahridagi Bosh konsulxonasi ma’lum qildi.
Ma’lum qilinishicha, avval mazkur holat yuzasidan Bosh konsulxona tomonidan tegishli konsullik-huquqiy choralar ko‘rilib, Rossiyaning vakolatli idoralari bilan diplomatik kanallar orqali muzokaralar olib borilgan.
Natijada Rossiya Tashqi ishlar vazirligining Nijniy Novgorod shahridagi vakolatxonasi bilan hamkorlikda M.S.ga nisbatan Rossiya Federatsiyasi Jinoyat kodeksining 329-moddasi (davlat ramzlarini tahqirlash) bo‘yicha jinoyat ishi qo‘zg‘atishni rad etish to‘g‘risida qaror qabul qilingan.
Shuningdek, migratsiya qonunchiligiga muvofiq fuqaroning O‘zbekistonga qaytishi bilan bog‘liq zarur tartib-taomillar amalga oshirilmoqda. Uning Vatanga qaytishi 2026-yil 6-avgustga belgilangan.
Bosh konsulxona O‘zbekiston fuqarolarining huquq va qonuniy manfaatlarini himoya qilish bo‘yicha zarur konsullik-huquqiy choralarni ko‘rishda davom etishini bildirdi.
