Sirdaryoda farzandini kiyim ilgich bilan urgan ona 3 sutkaga qamaldi
Ayol farzandi maktabdagi to‘garakka bormasdan ko‘chada o‘ynab yurganidan jahli chiqqan.
Sirdaryo viloyatida 10 yoshli farzandini maktab to‘garagiga bormagani uchun urgan ayolga nisbatan ma’muriy jazo tayinlandi. Bu haqda "Millar" dasturida xabar berildi.
Sud hujjatlariga ko‘ra, ayol farzandi maktabdagi to‘garakka bormasdan ko‘chada o‘ynab yurganidan g‘azablanib, qo‘lidagi kiyim ilgich bilan uning boshi va tanasining boshqa qismlariga urgan. Sud-tibbiy ekspertizasi xulosasiga ko‘ra, bolaga sog‘lig‘ining qisqa muddatli buzilishiga sabab bo‘lmagan yengil tan jarohati yetkazilgan.
Sud majlisida ayol qilmishidan pushaymon ekanini bildirib, o‘ziga yengillik berishni so‘radi. Jabrlanuvchining qonuniy vakili — bolaning otasi ham voqeadan ishdan qaytgach xabar topganini, turmush o‘rtog‘iga nisbatan da’vosi yo‘qligini va oilaning birligini inobatga olib, unga nisbatan yengillik qo‘llashni so‘radi.
Sud ayolni Ma’muriy javobgarlik to‘g‘risidagi kodeksning 59¹-2-moddasi ikkinchi qismi bilan aybdor deb topib, unga 3 sutka ma’muriy qamoq jazosini tayinladi.
Shuningdek, unga kelgusida shu kabi qilmishlarni takrorlasa, jinoiy javobgarlikka tortilishi mumkinligi haqida tushuntirish berildi.
