O‘zbekiston turizm o‘sishi bo‘yicha Markaziy Osiyoda yetakchiga aylandi — WTTC
Mamlakat turizm xizmatlari eksportidan 4,8 milliard dollar daromad oldi. Bu mintaqa ko‘rsatkichining yarmiga teng.
Jahon sayyohlik va turizm kengashi (WTTC)ning "Travel & Tourism Economic Impact Research 2026" hisobotiga ko‘ra, 2025-yilda Markaziy Osiyo turizm o‘sish sur’atlari bo‘yicha dunyoning eng tez rivojlanayotgan mintaqasi bo‘ldi. Hisobotda O‘zbekiston mintaqa davlatlari orasida asosiy turizm ko‘rsatkichlari bo‘yicha birinchi o‘rinni egallagani qayd etilgan.
WTTC dunyoni 13 ta yirik mintaqaga ajratgan holda tahlil olib boradi. Hisobotga ko‘ra, 2025-yilda Markaziy Osiyoda turizmning yalpi ichki mahsulotga umumiy hissasi 17,7 foizga, to‘g‘ridan to‘g‘ri hissasi esa 19,6 foizga oshgan.
Shuningdek, mintaqada turizm xizmatlari eksporti 9,9 milliard AQSh dollariga yetib, bir yil ichida 26,4 foizga o‘sgan. Mazkur ko‘rsatkichning qariyb yarmi O‘zbekiston hissasiga to‘g‘ri keladi. Hisobotda qayd etilishicha, 2025-yilda mamlakat 4,8 milliard dollarlik turizm xizmatlarini eksport qilgan.
WTTC ma’lumotlariga ko‘ra, Markaziy Osiyo aholisi orasida eng ommabop sayohat yo‘nalishi ham O‘zbekiston bo‘lgan. Mintaqa sayyohlarining 25 foizi O‘zbekistonni tanlagan bo‘lsa, undan keyingi o‘rinlarni Qozog‘iston (23 foiz), Qirg‘iziston (18 foiz), Rossiya (16 foiz) va Turkiya (6 foiz) egallagan.
Tashkilot O‘zbekistonning yetakchi o‘rinni egallashini mamlakatning boy tarixiy-madaniy merosi hamda mintaqaviy sayyohlar uchun yuqori jozibadorligi bilan izohlagan. Hisobotda Markaziy Osiyoda yagona turistik makonni shakllantirish uchun katta salohiyat mavjudligi, chegaralarni soddalashtirish, transport va aviaqatnovlarni rivojlantirish hamda qo‘shma turizm marshrutlari xalqaro sayyohlar oqimini yanada oshirishga xizmat qilayotgani ta’kidlangan.
Hisobotga ko‘ra, 2025-yilda turizm sohasidagi xarajatlarning 64,3 foizi xorijiy sayyohlar, 35,7 foizi esa ichki sayyohlar hissasiga to‘g‘ri kelgan. Xorijiy sayyohlar xarajatlarining 84,5 foizi dam olish, 15,5 foizi esa biznes maqsadlarida amalga oshirilgan.
WTTC prognoziga ko‘ra, 2036-yilga borib turizmning Markaziy Osiyo iqtisodiyotiga qo‘shadigan umumiy hissasi 29,7 milliard AQSh dollariga yetishi kutilmoqda.
