Ukrainaning AQSHdagi sobiq elchisi noqonuniy boylik orttirishda gumon qilinmoqda
Olga Stefanishina qariyb 310 ming dollarlik mol-mulkni yashirganlikda va noqonuniy boylik orttirganlikda gumonlanmoqda. Diplomat ayblovlarni rad etgan.
Ukrainaning AQSHdagi sobiq elchisi Olga Stefanishina noqonuniy boylik orttirish va mol-mulkini deklaratsiya qilmaslikda gumon qilinmoqda. Bu haqda Ukraina huquqni muhofaza qiluvchi organlariga tayanib, Reuters xabar berdi.
Prokuratura ma’lumotiga ko‘ra, Stefanishina 2024-yil boshidan 2025-yil o‘rtalarigacha egallab turgan lavozimida umumiy qiymati qariyb 310 ming AQSH dollariga teng bo‘lgan ikki xonadon va boshqa aktivlarni deklaratsiyada ko‘rsatmagan. Tergov organlari ushbu mol-mulkni uning rasmiy daromadi hisobiga sotib olish imkoni bo‘lmaganini ta’kidlamoqda.
Ukraina qonunchiligiga muvofiq, rasmiylar gumonlanuvchining ismini oshkor qilmagan. Biroq ular gap AQSHdagi sobiq elchi lavozimida ishlagan shaxs haqida ketayotganini bildirgan.
Olga Stefanishina esa Facebook’dagi sahifasida ayblovlarni rad etib, yashiradigan hech narsasi yo‘qligini ma’lum qilgan.
Stefanishina shu hafta boshida Prezident Volodimir Zelenskiy tomonidan elchilik lavozimidan ozod etilgan. Uning iste’fosi Ukraina hukumatidagi so‘nggi kadrlar almashinuvi fonida yuz berdi. Avvalroq mamlakat bosh vaziri va mudofaa vaziri ham lavozimidan ketgandi.
