Yangiyo‘l tajribasi asosida 13 tumanda yangi energetika tizimi yo‘lga qo‘yiladi
Yangiyo‘l tumanida elektr va gaz ta’minotini yaxshilash bo‘yicha maxsus shtab faoliyat yuritmoqda.
Prezident Shavkat Mirziyoyevga energetika tarmog‘ida belgilangan vazifalar ijrosi hamda kuz-qish mavsumiga tayyorgarlik ishlari yuzasidan axborot berildi.
Ta’kidlanishicha, 27-iyul kuni o‘tkazilgan videoselektor yig‘ilishida elektr va gaz ta’minoti barqarorligi, avariyalar va energiya yo‘qotishlarini qisqartirish, sohada boshqaruvni takomillashtirish bo‘yicha qator vazifalar belgilangan edi. Taqdimotda ushbu topshiriqlar ijrosi va kelgusidagi rejalar ko‘rib chiqildi.
Ma’lum qilinishicha, hozirda Yangiyo‘l tumanida elektr va gaz ta’minotini yaxshilash bo‘yicha maxsus shtab faoliyat yuritmoqda. Ushbu tajriba asosida yana 13 ta tumanda ham shunday tizimni yo‘lga qo‘yish, keyinchalik esa uni boshqa hududlarga tatbiq etish rejalashtirilgan.
Shuningdek, tadbirkorlarni elektr va gaz tarmoqlariga ulashda texnik shartlarni rasmiylashtirish jarayonlarining shaffofligini ta’minlash va korrupsiyaviy holatlarning oldini olish choralari kuchaytirilmoqda.
Kuz-qish mavsumiga tayyorgarlik doirasida muammoli tarmoqlar va uskunalarni yangilash, energiya yo‘qotishlarini kamaytirish, avariyaviy uzilishlar sabablarini bartaraf etish hamda energiya samaradorligini oshirish ishlari olib borilayotgani qayd etildi.
Prezident Energetika vazirligiga tarmoqda yagona va samarali boshqaruv tizimini shakllantirish, investitsiya loyihalarini o‘z vaqtida amalga oshirish va kuz-qish mavsumiga tayyorgarlikni tizimli tashkil etish bo‘yicha topshiriqlar berdi.
Bundan tashqari, “Hududiy elektr tarmoqlari” AJga elektr ta’minoti barqarorligini oshirish va infratuzilmani modernizatsiya qilish, O‘zenergoinspeksiyaga esa energiya resurslaridan oqilona foydalanish ustidan nazoratni kuchaytirish, yo‘qotishlarni qisqartirish hamda yirik iste’molchilarni energiya auditidan o‘tkazishni jadallashtirish vazifalari yuklatildi.
Davlat rahbari barcha choralarni manzilli va aniq hisob-kitoblar asosida amalga oshirish, aholi hamda iqtisodiyot tarmoqlarini elektr va gaz bilan barqaror ta’minlash zarurligini ta’kidladi.
