Aktyor va rejissyor Abdumannon Ubaydullayev vafot etdi
U vafotiga qadar O‘zbekiston davlat san’at va madaniyat instituti “Ovoz rejissyorligi va operatorlik mahorati” kafedrasida talaba yoshlarga ta’lim berib kelgan.
O‘zbekistonda xizmat ko‘rsatgan yoshlar murabbiysi, san’atshunoslik fanlari nomzodi, professor, taniqli kinoaktyor, rejissyor va pedagog Abdumannon Ubaydullayev vafot etdi. Bu haqda O‘zbekiston Kinoarboblari ijodiy uyushmasi ma’lum qildi.
Abdumannon Ubaydullayev kinorejissyor Zulfiqor Musoqovning “Vatan” filmidagi roli bilan keng jamoatchilikka tanilgan. U faoliyati davomida “Omad”, “So‘nggi lahza”, “Hijron”, “Nazar”, “Yigit yig‘lamasin”, “Aldangan ko‘ngil”, “Mehr” kabi ko‘plab badiiy filmlar hamda bir qator milliy teleseriallarda rollar ijro etgan.
Ijodkor pedagogik faoliyat bilan ham shug‘ullangan. U vafotiga qadar O‘zbekiston davlat san’at va madaniyat instituti “Ovoz rejissyorligi va operatorlik mahorati” kafedrasida talaba yoshlarga ta’lim berib kelgan.
