Afg‘onistonda har uch kishidan biri ochlik xavfi ostida

 

BMTning Jahon oziq-ovqat dasturi (WFP) Afg‘onistondagi oziq-ovqat inqirozi kuchayayotganidan ogohlantirdi. Tashkilot ma’lumotlariga ko‘ra, mamlakatda 14 milliondan ortiq kishi, ya’ni aholining qariyb uchdan bir qismi jiddiy oziq-ovqat xavfsizligi muammosiga duch kelmoqda.

 

WFPning Afg‘oniston bo‘yicha direktori Jon Iliffning ma’lum qilishicha, mamlakatning 34 viloyatidan 12 tasida bolalar orasida o‘tkir to‘yib ovqatlanmaslikning juda yuqori darajasi qayd etilgan. Eng og‘ir holatlarning qariyb 80 foizi ikki yoshgacha bo‘lgan bolalarga to‘g‘ri kelmoqda.

 

Tashkilot vaziyatning yomonlashishiga ishsizlikning ortishi, oziq-ovqat narxlarining ko‘tarilishi, savdo yo‘llaridagi uzilishlar hamda qo‘shni davlatlardan afg‘on fuqarolarining majburiy qaytarilishini asosiy omillar sifatida ko‘rsatmoqda.

 

WFP ma’lumotlariga ko‘ra, so‘nggi yillarda qariyb 6 million afg‘on qo‘shni mamlakatlardan qaytishga majbur bo‘lgan. Bu esa mamlakatdagi oziq-ovqat va bandlik bilan bog‘liq muammolarga qo‘shimcha bosim yaratgan.

 

Moliyalashtirishning qisqarishi sababli tashkilot oziq-ovqat yordamini kamaytirishga va mavjud resurslarni eng og‘ir holatlarga yo‘naltirishga majbur bo‘lgan. To‘yib ovqatlanmaslikning oldini olishga mo‘ljallangan maxsus oziq-ovqat mahsulotlarini yetkazib berish esa 2025-yil may oyida to‘xtatilgan.

 

WFPning hisob-kitoblariga ko‘ra, Afg‘onistondagi oziq-ovqat ehtiyojlarini qoplash uchun yil davomida qariyb 900 million dollar mablag‘ zarur. Tashkilot kelgusi olti oyda mamlakatning eng dolzarb oziq-ovqat ehtiyojlarini qondirish uchun yana 500 million dollar mablag‘ kerakligini bildirgan.

 

WFP UNICEF bilan hamkorlikda besh yoshgacha bo‘lgan to‘yib ovqatlanmayotgan bolalar, shuningdek, homilador va emizikli ayollarga yordam ko‘rsatish bo‘yicha dasturlarni amalga oshirmoqda.

 

Tashkilot donor davlatlarni Afg‘onistondagi gumanitar inqiroz oqibatlarini yumshatish uchun moliyaviy yordamni oshirishga chaqirmoqda.