AQSh razvedkasi Eron tahdidi haqida xabar berdi, Tehron esa buni inkor qildi
Eron AQSh OAVlaridagi xabarlar keyingi tajovuz uchun bahona yaratishga qaratilganini bildirgan.

Eronning BMTdagi Doimiy vakolatxonasi AQSh ommaviy axborot vositalarida Tehronning Vashingtonda radioaktiv moddalar tarqatuvchi bomba yoki kimyoviy qurol yordamida hujum uyushtirish rejasi borligi haqidagi xabarlarni dezinformatsiya deb atadi.
Ijtimoiy tarmoqlardagi bayonotda bu xabarlar keyingi tajovuz va urush jinoyatlari uchun bahona yaratishga qaratilgani bildirilgan. Shuningdek, Eron xalqaro huquqqa muvofiq o‘zini himoya qilish huquqini qat’iy himoya qilishini ta’kidlagan.
Bundan bir kun oldin CNN AQSh razvedkasi ma’lumotlariga tanish manbalarga tayanib, Eron Donald Tramp ma’muriyatining yuqori lavozimli amaldorlarini bomba yoki kimyoviy qurol yordamida o‘ldirish bo‘yicha turli rejalarni o‘rganayotganini xabar qilgan edi.
Telekanal manbalarining ta’kidlashicha, razvedka ma’lumotlari Tehron tomonidan yaqin vaqt ichida hujum uyushtirilishini anglatmaydi. Biroq ayrim manbalar ko‘rib chiqilayotgan rejalar, jumladan, ehtimoliy hujum joylari va nishonlari aniq ko‘rsatilganini bildirgan.
CNN suhbatdoshlaridan biri razvedka ma’lumotlariga tayanib, radioaktiv moddalar tarqatuvchi bomba tayyorlash uchun zarur materiallar AQSh hududiga avvalroq olib kirilgan bo‘lishi mumkinligini aytgan. Manbalarga ko‘ra, bu materiallar bir necha yil, hatto o‘nlab yillar oldin joylashtirilgan bo‘lishi ehtimoli ham ko‘rib chiqilmoqda.








