O‘zbekistonda rieltorlik faoliyati qonun bilan tartibga solindi
Yangi tartibga ko‘ra, rieltorlar maxsus o‘qitish va malaka imtihonidan o‘tib, sertifikat olishi, tashkilotlar esa Yagona reyestrga kiritilishi kerak bo‘ladi.
O‘zbekistonda rieltorlik faoliyatini tartibga soluvchi yangi qonun qabul qilindi. “Rieltorlik faoliyati to‘g‘risida”gi qonun 7-avgust kuni imzolangan.
Hujjatga ko‘ra, Davlat aktivlarini boshqarish agentligi rieltorlik sohasidagi vakolatli davlat organi etib belgilandi.
Rieltor sifatida faoliyat yuritish uchun talabgor maxsus o‘qitish dasturidan o‘tishi va malaka imtihonini muvaffaqiyatli topshirishi kerak. Shundan so‘ng unga professional jamoat birlashmasi tomonidan shtrix-kodli malaka sertifikati beriladi.
Rieltor rieltorlik tashkiloti tarkibida faoliyat yuritadi va malaka sertifikatiga ega bo‘lishi lozim. Rieltorlik tashkiloti hamda ko‘chmas mulk bo‘yicha agent Yagona reyestrga kiritilgan sanadan boshlab tegishli faoliyatni amalga oshirish huquqiga ega bo‘ladi.
Qonunda rieltorlik xizmatlarining asosiy turlari ham belgilangan. Ular qatoriga ko‘chmas mulk va unga bo‘lgan huquqlar bilan bog‘liq bitimlarni tuzishda vositachilik qilish, ko‘chmas mulk va unga bo‘lgan huquqlar savdosini tashkil etish, ko‘chmas mulkni ishonchli boshqarish, shuningdek, ko‘chmas mulk bozorida axborot, maslahat va reklama xizmatlarini ko‘rsatish kiradi.
Shuningdek, xususiy sektor tomonidan multilisting tizimi tashkil etilishi nazarda tutilgan. Ushbu tizim rieltorlik xizmatlarini muddatli shartnomalar asosida “yagona darcha” tamoyili orqali ko‘rsatish va elektron shaklda ishonchli axborot almashish imkonini beradi.
