Xivada “Qovun sayli – 2026” xalqaro festivali boshlandi

Xivada “Qovun sayli – 2026” xalqaro festivali ko‘tarinki kayfiyatda boshlandi. Qadimiy Ichan qal’a va zamonaviy “Arda Xiva” majmuasida o‘tayotgan festival ilk kunlardanoq qovunlar ifori, milliy an’analar, musiqa, gastronomiya va sayyohlik muhiti bilan shaharga o‘zgacha fayz bag‘ishladi.

 

 

Festivalning ilk kunida Xorazmning mashhur qovun navlari, mahalliy mahsulotlar va agro-brendlar namoyish etilib, mehmonlarga hududning ko‘p asrlik qovunchilik an’analari yaqindan tanishtirilmoqda. Milliy taomlar, hunarmandchilik namunalari, xalq ijodi va teatrlashtirilgan chiqishlar esa bayram muhitini yanada boyitmoqda.

 

 

Qadimiy shahar ko‘chalarida folklor jamoalari chiqishlari, milliy kuy-qo‘shiqlar va raqslar yangrab, festivalga tashrif buyurgan mahalliy aholi hamda sayyohlarga Xorazm madaniyatining o‘ziga xos ruhini his etish imkonini bermoqda.

 

 

Festival dasturining muhim yo‘nalishlaridan biri gastronomiya bo‘lib, mehmonlarga Xorazm oshxonasining an’anaviy taomlari hamda qovundan tayyorlangan turli mahsulotlar taqdim etilmoqda. Qovun ko‘rgazmasi va yarmarkasi esa saylning asosiy markazlaridan biriga aylangan.

 

 

Bayramona kayfiyatni taniqli san’atkorlarning chiqishlari ham davom ettirmoqda. 7-avgust kuni Gulsanam Mamazoitova, Yulduz Turdiyeva, Xulkar Abdullayeva, G‘ulomjon Yoqubov va boshqa ijodkorlar sahnaga chiqadi. Keyingi kunlarda esa MakSim, DJ Macarella, Botir Qodirov, Ziyoda Qobulova va boshqa san’atkorlar o‘zlarining boy ijodi bilan saylga tashrif buyuruvchilarga o‘zgacha ruh bag‘ishladi.

 

 

“Qovun sayli – 2026” shu tariqa Xivada nafaqat qovun va hosil bayrami, balki milliy madaniyat, gastronomiya, turizm va san’atni birlashtirgan katta xalq sayli ruhida boshlandi.

 

 

Qadimiy Xiva bugun mehmonlarni o‘zining shirin qovunlari, boy madaniyati, milliy taomlari va samimiy mehmondo‘stligi bilan qarshi olmoqda.