Bag'dodda 41 nafar qizga noqonuniy diniy ta'lim berilgani aniqlandi
Diniy ta’lim olgan 41 nafar voyaga yetmagan qizning ota-onalariga nisbatan ham ma’muriy bayonnomalar rasmiylashtirildi.
Bag‘dodda 41 nafar voyaga yetmagan qizga noqonuniy diniy ta’lim berilgani aniqlandi. Bu haqda Fargʻona viloyati IIB xabar berdi.
Farg‘ona viloyati ichki ishlar boshqarmasi hamda Davlat xavfsizlik xizmati xodimlari hamkorli 1987-yilda tug‘ilgan, Bag‘dod tumanining Durafshon mahallasida yashovchi ayol o‘z xonadonida hujra tashkil qilib, 41 nafar voyaga yetmagan qizga diniy saboq berib kelgani aniqlangan.
Ma’lumotlarga ko‘ra, qizlar Qo‘qon shahri, Uchko‘prik, Yozyovon, Buvayda va Bag‘dod tumanlarida yashovchi fuqarolarning farzandlari bo‘lgan. Ular hujrada yotib ta’lim olgan va har bir bola uchun ota-onalar oyiga 600 ming so‘mdan haq to‘lab kelgan.
Aniqlanishicha, diniy ta’lim berib kelgan ayol oliy ma’lumot va tegishli diplomga ega bo‘lmagan.
Holat yuzasidan hujra tashkil qilgan ayolga nisbatan O‘zbekiston Respublikasi Jinoyat kodeksining 229-2-moddasi 2-qismi bilan jinoyat ishi qo‘zg‘atilgan.
Shuningdek, hujrada diniy ta’lim olgan 41 nafar voyaga yetmagan qizning ota-onalariga nisbatan Ma’muriy javobgarlik to‘g‘risidagi kodeksning 47-moddasi 3-qismiga asosan ma’muriy bayonnomalar rasmiylashtirilgan.
