Denovda uyi buzilgan oilaga yangi turar joy qurib beriladi
Masala Surxondaryo viloyati hokimi tomonidan nazoratga olingan.
Ijtimoiy tarmoqlarda Surxondaryo viloyati Denov tumanida fuqaroning turar joyi buzilgani bilan bog‘liq turli xabarlar tarqaldi. Mazkur holat yuzasidan Majburiy ijro byurosining Surxondaryo viloyati boshqarmasi rasmiy munosabat bildirib, mazkur uy sud hujjati asosida buzilganini ta'kidlagan.
O‘rganishlar davomida turar joy fuqaroning kadastr hujjatlari mavjud bo‘lgan qonuniy yer maydoniga tutash hududda, fermer xo‘jaligining dala maydonida qurilgani aniqlangan.
Ya’ni, turar joyning aynan mazkur hududda qurilishi qonunchilik talablariga zid ekani sud hujjatida o‘z aksini topgan va ijro harakatlari shu hujjat asosida amalga oshirilgan.
Shu bilan birga, fuqaroning uy-joy bilan bog‘liq muammosi e’tibordan chetda qoldirilmagan. Masala Surxondaryo viloyati hokimi tomonidan shaxsan nazoratga olingan va fuqaro bilan suhbat o‘tkazilgan.
Uchrashuv davomida oilaning uy-joy muammosini qonuniy asosda hal etish masalasi muhokama qilingan. Xususan, fuqaro uchun qonuniy yer maydonidan yangi turar joy qurish imkoniyati ko‘rib chiqilmoqda.
Shuningdek, mavjud qurilish materiallari va uyning saqlanib qolgan qismlaridan imkon qadar foydalanish, yetishmaydigan qurilish materiallarini ta’minlash hamda yangi turar joyni imkon qadar qisqa muddatda barpo etish bo‘yicha tegishli topshiriqlar berilgan.
Masala doirasida oilaga zarur ijtimoiy, tibbiy va psixologik yordam ko‘rsatish imkoniyatlari ham ko‘rib chiqilmoqda. Xususan, oila a’zolarining, jumladan, voyaga yetmagan farzandlarning ruhiy holatini inobatga olgan holda mutaxassislarni jalb etish rejalashtirilgan.
