Farg‘onada Kadastrlar palatasi filiali rahbariga nisbatan jinoyat ishi qo‘zg‘atildi
U noqonuniy qurilgan savdo do‘koniga nisbatan chora ko‘rmaslik evaziga fuqarodan 600 dollar olgan.
Farg‘ona viloyatidagi tumanlardan birida Davlat kadastrlari palatasi filiali rahbari noqonuniy qurilgan savdo do‘koniga nisbatan qonuniy chora ko‘rmaslik evaziga pul olgani aniqlandi. Bu haqda DXX xabar berdi.
Ma’lum qilinishicha, mansabdor shaxs 1990-yilda tug‘ilgan fuqaroning noqonuniy qurilgan savdo do‘koniga nisbatan Kadastr agentligining tuman bo‘limi tomonidan tuzilgan dalolatnomani bekor qildirish hamda unga nisbatan qonuniy chora ko‘rilishini bartaraf etish evaziga joriy yil iyul oyi boshlarida 600 AQSH dollari olgan.
Biroq mansabdor shaxs va’dasini bajarmagan va keyinchalik fuqaroga 500 AQSH dollarini qaytarib bergan.
Mazkur holat Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor-qidiruv tadbirlari davomida aniqlangan.
Holat yuzasidan Kadastrlar palatasi filiali rahbariga nisbatan jinoyat ishi qo‘zg‘atilgan.
Hozirda mazkur ish bo‘yicha dastlabki tergov harakatlari olib borilmoqda.
