Jizzaxda mast fuqarolar restoranda hisobni to‘lamay, janjal ko‘tardi

 

Jizzax viloyati Forish tumanida profilaktika inspektorlari va fuqarolar ishtirokidagi mojaro aks etgan video ijtimoiy tarmoqlarda tarqaldi. Holat yuzasidan Jizzax viloyati IIB rasmiy munosabat bildirdi.

 

IIB ma’lumotiga ko‘ra, voqea 5-avgust kuni soat 21:30 larda Forish tumani «Oqtepa» MFY hududidagi restoranda sodir bo‘lgan.

 

Restoran xodimlari IIBga murojaat qilib, mast holdagi bir guruh shaxslar buyurtma qilingan taomlar uchun to‘lov qilmayotgani, tartibbuzarlik sodir etayotgani va janjal chiqarayotganini bildirgan.

 

Chaqiruv asosida voqea joyiga profilaktika inspektorlari hamda Qo‘riqlash bo‘limi xodimlari yetib borgan. Ular tomonidan jamoat tartibini tiklash va vaziyatni barqarorlashtirish choralari ko‘rilgan.

 

IIB ma’lumotiga ko‘ra, tartibbuzarlardan biri — muqaddam sudlangan ayol — xodimlarning qonuniy talablariga bo‘ysunmay, janjalni davom ettirgan. Shu sababli u belgilangan tartibda tibbiy ko‘rikdan o‘tkazilib, mastlik holatidagi shaxslarni vaqtincha saqlash va reabilitatsiya qilish punktiga — «Xushyorxona»ga joylashtirilgan.

 

Tibbiy ko‘rik davomida mazkur fuqaroning tanasida tan jarohatlari aniqlanmagan.

 

Keyinchalik uning qizlari «Xushyorxona»ga kelib, jamoat tartibini buzgan. Rasmiy ma’lumotga ko‘ra, ular xodimlarga nisbatan haqoratli so‘zlar ishlatgan hamda ularga tan jarohati yetkazishga uringan.

 

Vaziyat xodimlar tomonidan qonunchilikda belgilangan tartibda bartaraf etilgan. IIB ushbu jarayonda fuqarolarga nisbatan qo‘l kishani, rezina tayoq yoki elektrshoker kabi maxsus vositalar qo‘llanmaganini ma’lum qilgan.

 

Ayni vaqtda hodisada ishtirok etgan barcha shaxslarning xatti-harakatlariga huquqiy baho berish maqsadida tergovga qadar tekshiruv harakatlari olib borilmoqda.