Navoiy shahar hokimligi AI yordamida tayyorlangan obodonlashtirish suratlari uchun uzr so‘radi
Hokimlik axborot xizmatiga ko‘ra, materiallarni tayyorlashda sun’iy intellekt elementlaridan foydalanilgan va ular tegishli tekshiruvdan o‘tkazilmasdan ijtimoiy tarmoqlarda e’lon qilingan.
Navoiy shahrining “Hayot” mahallasida amalga oshirilgan obodonlashtirish va bunyodkorlik ishlari aks etgan fotomateriallarda sun’iy intellekt texnologiyalaridan foydalanilgani yuzasidan shahar hokimligi rasmiy munosabat bildirdi.
Hokimlik axborot xizmatiga ko‘ra, ijtimoiy tarmoqlarga materiallarni tayyorlash va joylashtirish jarayonida mas’ul xodimlar tomonidan e’tiborsizlikka yo‘l qo‘yilgan. Mahalladagi o‘zgarishlarni ko‘rgazmali formatda taqdim etish maqsadida dizayn jarayonida sun’iy intellekt elementlaridan foydalanilgan va materiallar tegishli tekshiruvdan o‘tkazilmasdan e’lon qilingan.
Hokimlik mazkur holat va jamoatchilik e’tirozlari yuzasidan fuqarolardan uzr so‘ragan. Materiallarni tayyorlashga mas’ul xodimlar ogohlantirilgani ma’lum qilingan.
Shu bilan birga, hokimlik “Hayot” mahallasida aholi turmush sharoitini yaxshilash bo‘yicha amaliy ishlar amalga oshirilganini bildirgan. Ushbu ishlarning natijalarini ko‘rsatish uchun munosabatga mahalla hududining hozirgi holatini aks ettiruvchi ishlov berilmagan foto va videolar ilova qilinayotgani qayd etilgan.
Hokimlik axborot xizmati OAV vakillari, blogerlar va jamoatchilik vakillarini mahallaga tashrif buyurib, amalga oshirilgan ishlarni joyida baholashga taklif qilgan.
Shuningdek, kelgusida axborot xizmati faoliyatida shu kabi xatolarga yo‘l qo‘ymaslik uchun nazorat va talablar kuchaytirilishi ma’lum qilingan.
