Namanganda sobiq bank rahbari 20 ming dollar pora bilan qo‘lga tushdi
U yer maydonining kadastr hujjatlarini rasmiylashtirib berish evaziga fuqarodan jami 29 ming dollar talab qilgan.
Bosh prokuratura huzuridagi Iqtisodiy jinoyatlarga qarshi kurashish departamentining Namangan viloyati boshqarmasi tomonidan o‘tkazilgan tezkor tadbirda sobiq bank rahbari katta miqdordagi pul mablag‘larini olayotgan vaqtida ushlandi.
Departamentning ma'lum qilishicha, Yangi Namangan tumanida yashovchi fuqaro Departamentning Namangan viloyati boshqarmasiga murojaat qilib, Sanoat-qurilish bankining Namangan viloyat filialida sobiq boshqaruvchi lavozimida ishlagan shaxs ustidan ariza bilan murojaat qilgan.
Arizaga ko‘ra, sobiq bank rahbari fuqaroning Norin tumanida joylashgan, baliqchilikni rivojlantirish maqsadida ijara asosida foydalanishga berilishi rejalashtirilgan yer maydonini rasmiylashtirib berishni va’da qilgan.
Buning uchun u viloyat Yagona buyurtmachi injiniring kompaniyasi hamda viloyat Nasos stansiyalari va energetika boshqarmasida ishlovchi mansabdor tanishlari orqali yer maydonining kadastr hujjatlarini rasmiylashtirib berishini aytib, fuqaroning 29 ming AQSH dollari miqdorida pul mablag‘ini berishini talab qilgan.
Arizachi oldindan 20 ming AQSH dollari berishga kelishgani haqida ma’lum qilgan.
Murojaatda keltirilgan ma'lumotlarni tekshirish maqsadida Departamentning Namangan viloyati boshqarmasi tomonidan 30-iyul kuni tezkor tadbir o‘tkazilgan.
Tadbir davomida sobiq bank boshqaruvchisi Davlatobod tumanidagi ko‘p qavatli uylar oldida arizachidan kimyoviy ishlov berilgan 20 ming AQSH dollarini olayotgan vaqtida qo‘lga olingan. Pul mablag‘lari ashyoviy dalil sifatida rasmiylashtirib olingan.
Mazkur holat yuzasidan Departamentning Namangan viloyati boshqarmasi tomonidan Jinoyat kodeksining tegishli moddalari bilan jinoyat ishi qo‘zg‘atilgan.
Hozirda holat yuzasidan tergovga oid harakatlar olib borilmoqda.
