Surxondaryoda fuqarolar ikki YPX xodimini kaltakladi
Damas’ni mast holda boshqarib ketayotgan haydovchi YPX xodimlaridan qochishga uringan va uning yaqinlari xizmat vazifasini bajarayotgan IIO xodimlariga qarshilik ko‘rsatib, ikki nafar xodimga tan jarohati yetkazgan.
Surxondaryo viloyati Angor tumanida xizmat vazifasini bajarayotgan YPX xodimlariga faol qarshilik ko‘rsatilib, ikki nafar xodimga tan jarohati yetkazildi. Bu haqda Surxondaryo viloyati YHXB matbuot xizmati ma’lum qildi.
Ma’lum qilinishicha, 2026-yil 9-avgust kuni Angor tumanida 1987-yilda tug‘ilgan fuqaro T. U. “Damas” avtomashinasini boshqarib ketayotgan vaqtida xizmat olib borayotgan YPX xodimlarini ko‘rib, harakat yo‘nalishini o‘zgartirgan va qochishga uringan.
YPX xodimlari avtomashinani kuzatib borib, “Ilg‘or” mahallasidagi xonadon yaqinida haydovchini to‘xtatgan. U avtomobildan tushib, qochishga harakat qilgan. Xodimlar haydovchidan spirtli ichimlik hidi kelayotganini aniqlab, uni tibbiy ko‘rikdan o‘tkazish uchun olib borishga uringan.
Shu vaqtda voqea joyiga haydovchining ukalari, turmush o‘rtog‘i va qo‘shnisi yetib kelib, xizmat vazifasini bajarayotgan ichki ishlar organlari xodimlariga faol qarshilik ko‘rsatgan. Natijada ikki nafar YPX xodimiga tan jarohati yetkazilgan.
Holat yuzasidan Angor tumani prokuraturasi va IIBning tezkor-tergov guruhi voqea joyiga yetib borib, holatni o‘rgangan. Shu kunning o‘zida fuqarolarga nisbatan Jinoyat kodeksining 219-moddasi 2-qismi bilan jinoyat ishi qo‘zg‘atilgan.
Shuningdek, Surxondaryo viloyati IIB mas’ul xodimlari tomonidan YPX xodimlarining xatti-harakatlari yuzasidan ham xizmat tekshiruvi o‘tkazilishi belgilangan. Tekshiruv yakunlari bo‘yicha qo‘shimcha ma’lumot berilishi ma’lum qilindi.
