Inson huquqlari tashkilotlari Tramp ma’muriyatini sudga berdi
Da’vogarlar Vashingtonning Xalqaro jinoiy sudga qarshi sanksiyalar siyosatini noqonuniy deb atagan.
AQSHdagi to‘rtta yirik inson huquqlari tashkiloti Donald Tramp ma’muriyatiga qarshi sudga murojaat qildi. Human Rights Watch, Open Society Institute, American Friends Service Committee va Center for Constitutional Rights Nyu-Yorkdagi federal sudga bergan da’vosida Vashingtonning Xalqaro jinoiy sudga qarshi sanksiyalar siyosatini noqonuniy deb atadi. Bu haqda Reuters xabar berdi.
Tashkilotlarning ta’kidlashicha, Tramp tomonidan chiqarilgan farmon Xalqaro jinoiy sud prokurorlari, sudyalari va boshqa xodimlariga nisbatan sanksiyalar qo‘llash imkonini bergan. Ushbu choralar AQSH yoki uning ittifoqchisi Isroil rasmiylariga nisbatan tergov va ishlar olib borayotgan sud xodimlariga ham taalluqli.
Da’vogarlar sanksiyalar sababli inson huquqlari bo‘yicha tashkilotlarning genotsid, urush jinoyatlari va insoniyatga qarshi jinoyatlar yuzasidan Xalqaro jinoiy sud bilan hamkorlik qilishi qiyinlashganini bildirdi. Ular amaldagi sanksiyalarni bekor qilishni hamda prezidentning bunday cheklovlarni joriy etish vakolatini qayta ko‘rib chiqishni so‘ramoqda.
Tashkilotlar, shuningdek, sanksiyalar so‘z erkinligi va diniy erkinlik kabi AQSH Konstitutsiyasida kafolatlangan huquqlarni buzayotganini da’vo qilmoqda. Ularning advokati Endryu Louenshteyn bu choralar prezident vakolatlari doirasidan chiqishini va AQSH hamda xalqaro qonunchilikka zid ekanini ta’kidladi.
O‘tgan oy Falastin inson huquqlari bilan shug‘ullanuvchi tashkilotlar ham shunga o‘xshash da’vo bilan murojaat qilgan. Bundan tashqari, Xalqaro jinoiy sudning uch nafar sudyasi ham AQSH sanksiyalariga qarshi sudga murojaat qilgan.
AQSH Davlat kotibi Marko Rubio esa ma’muriyat Xalqaro jinoiy sudga qarshi diplomatik bosimni kuchaytirishini bildirgan. U boshqa davlatlarni ham Gaagadagi suddan chiqishga ko‘ndirish bo‘yicha kampaniya olib borilishini aytgan. Tramp esa 31-iyuldagi hukumat yig‘ilishida bu siyosatning asosiy maqsadi o‘zini emas, Isroil bosh vaziri Binyamin Netanyaxu va boshqa Isroil rasmiylarini himoya qilish ekanini bildirgan.
