“Rossiya kemalari musodara qilinsa, javob qaytaramiz” – Putin
Rossiya prezidenti Yevropa davlatlarini Rossiya savdo kemalarini qo‘lga olishdan ogohlantirdi va bunday holat javobsiz qolmasligini aytdi.
Rossiya prezidenti Vladimir Putin Yevropa davlatlari Rossiyaning savdo kemalarini musodara qiladigan bo‘lsa, Moskva bunga javoban tegishli choralar ko‘rishini ma’lum qildi. Bu haqda Rossiyaning davlat axborot agentligi TASS xabar berdi.
Yevropa Ittifoqi Rossiyaning “soya floti” deb ataladigan, sanksiyalarni chetlab o‘tishda foydalanilayotgan kemalariga qarshi nazorat va bosimni kuchaytirayotgan edi. Yevropa davlatlari sanksiyalarni buzishda gumon qilinayotgan ayrim kemalarni tekshirish va ushlab turish choralarini ham ko‘rmoqda.
Putin bunday harakatlarni “qaroqchilik va banditizm” deb atadi. Uning aytishicha, agar Rossiya kemalarini qo‘lga olish amaliyoti haqiqatan ham boshlansa, Moskva “javoban xuddi shunday choralar” ko‘radi.
Rossiya prezidenti javob choralari faqat Rossiya kemalari qo‘lga olingan hudud bilan cheklanib qolmasligini ham bildirdi. Uning so‘zlariga ko‘ra, Rossiya o‘ziga ma’qul va zarur deb hisoblagan istalgan hududda javob berishi mumkin.
Putin bu bayonotlarni Rossiyaning Uzoq Sharqidagi Saxalin orolida harbiy mashg‘ulotlarni kuzatayotgan vaqtida bildirgan. U, shuningdek, NATOning Osiyo-Tinch okeani va Arktika hududlaridagi faolligi kuchayayotganini tanqid qilgan.
