“Aybimiz bo‘lsa, uzrimizni so‘raymiz” — Chinoz hokimi
Chinoz tumani hokimi Sherzod Solihov “Sharmandali mahalla” va “Uyatli xonadon” yozuvlari aks etgan video yuzasidan izoh berdi.
Ijtimoiy tarmoqlarda Chinoz tumani hokimi Sherzod Solihovning ayrim mahallalarni “Sharmandali mahalla”, xonadonlarni esa “Uyatli xonadon” toifasiga ajratish haqidagi topshirig‘i aks etgan video keng muhokamalarga sabab bo‘ldi.
Mazkur holat yuzasidan tuman hokimi izoh berib, bunday topshiriq yuqori turuvchi tashkilotlardan berilmaganini, bu uning shaxsiy tashabbusi bo‘lganini ma’lum qilgan.
Hokimning so‘zlariga ko‘ra, yig‘ilish davomida hududlardagi obodonlashtirish va sanitariya holatini yaxshilash maqsadida, topshiriqlar bajarilmagan taqdirda “Sharmandali mahalla” va “Uyatli xonadon” kabi yozuvlardan foydalanish mumkinligini aytgan. Biroq bu amaliyot sifatida joriy etilmagan.
“Sharmandali mahalla” degan banner yopishtirilib, yana o‘sha zahoti ko‘chirib olib ketilgan. Faqat ijtimoiy tarmoqqa chiqarish uchun videoga olingan. Lekin birorta xonadonga, birorta mahallaga osmaganman”, — degan Sherzod Solihov.
Ushbu tashabbusdan maqsad “Dolzarb 40 kunlik” tadbiri doirasida mahallalarda obodonlashtirish ishlarini jadallashtirish va mas’ullarni faolroq ishlashga undash bo‘lganini ta’kidlagan.
Hokim “Sharmandali mahalla” va “Uyatli xonadon” kabi atamalar mahalla faollari yoki aholini sharmanda qilish uchun emas, balki e’tiborni muammolarga qaratish va obodonlashtirish ishlarini kuchaytirish maqsadida qo‘llanganini bildirgan.
Shu bilan birga, Sherzod Solihov tashabbus ayrimlar tomonidan qo‘pol talqin qilinganini tan olgan.
“Balki sal qo‘polroq bo‘lib ketgan bo‘lishi mumkin, buni tan olaman”, — degan u.
Tuman hokimi xatoga yo‘l qo‘yilgan bo‘lsa, buning uchun uzr so‘rashga tayyorligini ham bildirgan.
“Beayb — Parvardigor. Aybimiz bo‘lsa, uzrimizni so‘raymiz”, — degan Sherzod Solihov.
