Jurnalistlar Trampni sudga berdi
Ikki media tashkiloti Truth API xizmatini to‘xtatishni va Oq uyning rasmiy bayonotlarini faqat ushbu platforma orqali e’lon qilishiga yo‘l qo‘ymaslikni talab qilmoqda.
AQSh prezidenti Donald Tramp ikki media tashkiloti tomonidan sudga berildi. Da’vogarlar prezidentning Truth Social’dagi postlarini, jumladan, moliya bozorlariga ta’sir ko‘rsatishi mumkin bo‘lgan xabarlarini boshqalardan oldin olish imkonini beruvchi pullik xizmatni to‘xtatishni talab qilmoqda.
Manxetten federal sudiga The Intercept va Freedom of the Press Foundation tomonidan kiritilgan da’vo Trump Media & Technology Group kompaniyasi ishga tushirgan Truth API xizmatiga qarshi qaratilgan.
Ushbu xizmat foydalanuvchilarga Trampning o‘zi ham kiradigan Truth Social’dagi 10 ta mashhur akkaunt postlarini keng jamoatchilikdan oldin olish imkonini beradi. Buning uchun oyiga 100 ming dollargacha to‘lov undiriladi.
Da’vogarlar mazkur xizmat prezidentning bayonotlariga barcha uchun teng va bepul kirish imkoniyati bo‘lishi kerakligi haqidagi konstitutsiyaviy tamoyillarga zid ekanini ta’kidlamoqda. Shuningdek, ular Trampning o‘z postlaridan moliyaviy manfaat ko‘rishi manfaatlar to‘qnashuvini yuzaga keltirishini bildirgan.
Trump Media vakili esa kompaniya xizmatini himoya qilib, Trampning bayonotlari boshqa ko‘plab platformalar va OAV orqali ham tarqatilishini aytdi.
Reuters ma’lumotiga ko‘ra, Donald Tramp Trump Media kompaniyasining eng yirik aksiyadori bo‘lib, uning 41,3 foizlik ulushi taxminan 950 million dollarga baholanmoqda.
