AQSH 40 dan ortiq davlatni Xitoy tovarlariga bojlarni chetlab o‘tishda yordam berishda aybladi — ro‘yxatda O‘zbekiston ham bor

 

AQSH 13-avgust kuni “The Great Transshipment Scam” (“Katta qayta yuklash firibgarligi”) nomli hisobotni e’lon qildi. Unda Xitoy tovarlarini AQSHning yuqori bojlaridan chetlab o‘tkazish uchun uchinchi davlatlardan foydalanilayotgani haqida so‘z yuritilgan.

 

Hisobotda qayd etilishicha, Xitoyda ishlab chiqarilgan ayrim mahsulotlar boj stavkalari nisbatan past bo‘lgan mamlakatlarga olib chiqilib, u yerda ularga minimal darajada ishlov berish, qayta qadoqlash yoki markirovka qilish orqali boshqa davlatda ishlab chiqarilgandek ko‘rsatilishi mumkin. Natijada mahsulotlar AQSH bozoriga Xitoy tovarlariga nisbatan qo‘llanadigan yuqori bojlarni chetlab o‘tgan holda kirib keladi.

 

AQSH ma’muriyati bunday amaliyotda foydalanilayotgan davlatlarni uchta toifaga ajratgan.

 

Uchinchi toifaga AQSH bozoriga imtiyozli kirish imkoniyatiga ega yoki bojxona nazorati nisbatan cheklangan davlatlar kiritilgan. Ushbu ro‘yxatda O‘zbekiston va Qozog‘iston bilan bir qatorda Ozarbayjon, Gruziya, Turkiya, BAA, Singapur, Shveytsariya, Panama, Peru, Kambodja, Vyetnam va boshqa davlatlar ham qayd etilgan.

 

Hisobotda O‘zbekiston, Qozog‘iston, Ozarbayjon va Gruziya Xitoyning “Bir makon — bir yo‘l” tashabbusi doirasidagi quruqlikdagi tranzit yo‘nalishlari uchun muhim logistika nuqtalari sifatida ko‘rsatilgan.

 

Oq uy hisob-kitoblariga ko‘ra, bojlarni chetlab o‘tish bilan bog‘liq qayta yuklash amaliyotlari natijasida AQSH federal daromadlari yiliga 19–26 milliard dollar kamayishi mumkin.

 

Hisobotda, shuningdek, bunday sxemalar AQSH ishlab chiqaruvchilari va ishchi kuchiga salbiy ta’sir ko‘rsatishi ta’kidlangan.

 

Hisobotda O‘zbekistonning ushbu sxemalarda bevosita ishtirok etgani yoki noqonuniy faoliyat sodir etgani haqida alohida xulosa berilmagan. O‘zbekiston AQSH tomonidan qayta yuklash uchun foydalanilishi mumkin bo‘lgan davlatlar ro‘yxatida tilga olingan.