Rossiya Qora dengizda o‘t ochishni to‘xtatish taklifini rad etdi
Moskva bunday kelishuv Kiyevga vaqtinchalik “nafas rostlash” imkonini berishini, hozircha moratoriy uchun asos yo‘qligini bildirdi.
Rossiya Qora dengizda Ukraina bilan o‘t ochishni to‘xtatish bo‘yicha taklifni qo‘llab-quvvatlamadi. Moskva Kiyevga vaqtinchalik “nafas rostlash” imkonini beradigan kelishuv uchun asos yo‘qligini bildirdi. Bu haqda Reuters xabar berdi.
Rossiya TIV matbuot kotibi Mariya Zaxarova Ukraina tomonidan Qora dengizdagi fuqarolik kemalariga qarshi hujumlar amalga oshirilayotganini aytib, buni mintaqadagi vaziyatni beqarorlashtirish va mojaroni cho‘zishga qaratilgan siyosat sifatida baholadi.
Zaxarovaning ta’kidlashicha, Rossiya vaziyat yaxshilanayotganiga ishora ko‘rmayapti. Shu sababli Moskva “yarim choralar”ni qo‘llashga asos yo‘q, deb hisoblaydi.
Rossiya TIV vakili bu bayonotni Turkiya tashqi ishlar vaziri Hakan Fidanning Qora dengizdagi harbiy amaliyotlarga moratoriy joriy etish bo‘yicha Rossiya va Ukrainaga takliflar yuborilgani haqidagi so‘zlariga javoban bildirdi. Zaxarovaning aytishicha, Rossiya Turkiyadan bunday rasmiy taklif olmagan.
Avvalroq Reuters Ukraina uchinchi tomon vositachiligida Rossiyaga Qora dengizda fuqarolik nishonlariga hujumlarni ikki tomon ham to‘xtatishi bo‘yicha taklif yuborgani haqida xabar bergan.
Moskva, shuningdek, 2022–2023-yillarda Turkiya vositachiligida tuzilgan Qora dengiz don tashabbusiga qaytish imkoniyatini ham rad etdi.
Rossiya mazkur kelishuvni bir tomonlama deb hisoblaydi. Bitim Rossiya Ukraina va G‘arb kelishuv shartlarini bajarmaganini bildirganidan keyin amalda to‘xtagan.
So‘nggi haftalarda Rossiya va Ukraina Qora dengizdagi tijoriy kemalarga qarshi hujumlarni kuchaytirgani, bu esa jahon bozorida don narxlarining oshishiga sabab bo‘lgani qayd etilgan.
