Andijonda bog‘cha litsenziyasi uchun 10 ming dollar so‘ragan shaxs ushlandi
U kelishilgan pulning 5 ming dollarini olayotgan vaqtida qo‘lga olingan.
Andijon viloyatida xususiy maktabgacha ta’lim muassasasi tashkil etish uchun zarur litsenziya va ruxsatnomalarni olib berishni va’da qilib, 10 ming dollar talab qilgan shaxs ushlandi. Bu haqda Ichki ishlar vazirligi ma’lum qildi.
Qayd etilishicha, 1984-yilda Andijon tumanida tug‘ilgan fuqaro Baliqchi tumanida yashovchi, 1974-yilda tug‘ilgan fuqaroga xususiy maktabgacha ta’lim muassasasi tashkil etishda yordam berishini bildirgan.
U o‘zining yuqori lavozimdagi tanishlari orqali litsenziya va boshqa zarur ruxsatnomalarni olib berishni va’da qilib, buning evaziga 10 ming AQSh dollari talab qilgan.
IIVning ma’lum qilishicha, o‘tkazilgan tezkor tadbir davomida gumonlanuvchi Andijon shahridagi Mustaqillik mahallasida kelishilgan 5 ming AQSh dollarini olayotgan vaqtida ashyoviy dalillar bilan qo‘lga olingan.
Mazkur holat yuzasidan jinoyat ishi qo‘zg‘atilgan. Gumonlanuvchi protsessual tartibda ushlangan.
Hozirda holat yuzasidan dastlabki tergov harakatlari olib borilmoqda.
