Banklarning moliyaviy holatini tiklash rejalariga qo‘yiladigan talablar belgilandi
Banklar moliyaviy qiyinchiliklarga duch kelgan taqdirda ularning faoliyatini tiklashga qaratilgan rejalar endilikda belgilangan talablar asosida ishlab chiqiladi.
Banklarning moliyaviy holatini tiklash rejalariga qo‘yiladigan talablar hamda ularni Markaziy bankka taqdim etish va baholash tartibi belgilandi.
Adliya vazirligi tomonidan Banklarning moliyaviy ahvolini tiklash rejasiga qo‘yiladigan talablar to‘g‘risidagi idoraviy hujjat davlat ro‘yxatidan o‘tkazildi. Hujjat 2026-yil 13-avgust kuni 3924-raqam bilan ro‘yxatdan o‘tgan.
Unga ko‘ra, bankning moliyaviy holatini tiklash rejasi bank kuzatuv kengashi tomonidan tasdiqlanadi. Bank ichki audit xizmati esa ushbu rejaning ishlab chiqilishi, yangilanishi va amalga oshirilishini yiliga kamida bir marta mustaqil baholaydi.
Tiklash rejasi quyidagi yo‘nalishlarni o‘z ichiga oladi:
— rejani boshqarish bo‘yicha ma’lumotlar;
— strategik tahlil;
— tiklash ko‘rsatkichlari;
— tiklash chora-tadbirlari;
— tiklash ssenariylari;
— reja doirasida kommunikatsiya qilish tartibi;
— rejani amalga oshirishga tayyorgarlik choralari.
Bank tiklash rejasini har yili yangilashi kerak. Shuningdek, bankning tashkiliy tuzilmasi, faoliyati yoki moliyaviy holatida rejaga ta’sir qilishi mumkin bo‘lgan sezilarli o‘zgarishlar yuz bergan taqdirda ham hujjat qayta ko‘rib chiqiladi.
Mazkur hujjat rasmiy e’lon qilingan kundan boshlab uch oy o‘tgach kuchga kiradi.
