Indoneziyada 7,7 magnitudali zilzila oqibatida besh kishi halok bo‘ldi
7,7 magnitudali zilziladan so‘ng 6,2 magnitudagacha bo‘lgan takroriy silkinishlar qayd etildi.
Indoneziyada 7,7 magnitudali kuchli zilzila sodir bo‘lib, kamida besh kishi halok bo‘ldi. Bu haqda Reuters Sharqiy Nusa Tenggara gubernatori Emanuel Melquiades Laka-Lenaga tayanib xabar berdi.
Gubernatorning ma’lum qilishicha, qurbonlar zilzila vaqtida uyquda bo‘lgan va binolarning vayronalari qulashi oqibatida halok bo‘lgan.
Avvalroq Indoneziyaning Tabiiy ofatlarni boshqarish milliy agentligi (BNPB) ikki kishi — bir erkak va bir ayol halok bo‘lganini bildirgan edi.
Zilzila oqibatida Nagekeo, Sikka va G‘arbiy Manggarai hududlarida talafotlar qayd etilgan. Sikka tumanidagi El Sai portiga zarar yetgan, bir kishi jarohat olgan. Zilziladan cho‘chigan aholi uylarini tark etib, xavfsiz hududlarga chiqishga harakat qilgan.
Asosiy zilziladan keyin 6,2 magnitudagacha bo‘lgan takroriy yer silkinishlari ham kuzatilgan. Dastlabki ma’lumotlarga ko‘ra, ular qo‘shimcha sunami xavfini yuzaga keltirmagan.
Avvalroq zilzila sabab Indoneziyaning uchta viloyatida sunami haqida ogohlantirish e’lon qilingan edi. Mahalliy nashrlar zilzila oqibatida uylar, maktablar, davlat idoralari va tibbiyot muassasalariga zarar yetganini xabar qilgan.
Yevropa-O‘rta yer dengizi seysmologiya markazi ma’lumotlariga ko‘ra, zilzila episentri Labuan Bajo shahridan 161 kilometr shimoli-sharqda, taxminan 35 kilometr chuqurlikda joylashgan.
Ayni paytda mahalliy va favqulodda vaziyatlar xizmatlari zarar ko‘rgan hududlarda vaziyatni monitoring qilish, aholini evakuatsiya qilish va jabrlanganlarga yordam ko‘rsatish ishlarini davom ettirmoqda.
