Kolumbiyada kon portlashi oqibatida olti kishi halok bo‘ldi
Tekshiruvdan avval konda xavfsizlik talablari buzilgani aniqlangan va uning faoliyatini to‘xtatish haqida ko‘rsatma berilgan.
Kolumbiyaning markaziy Kundinamarka departamentidagi Kukunuba hududida joylashgan konda portlash sodir bo‘lib, olti konchi halok bo‘ldi. Bu haqda Blu Radio departament gubernatori Xorxe Emilio Rey Anxelga tayanib xabar berdi.
Ma’lum qilinishicha, hodisa La Ramada hududidagi El Porvenir 1 konida yuz bergan. Portlashdan so‘ng konda bo‘lgan konchilar bilan aloqa uzilgan.
Qutqaruvchilar tomonidan olib borilgan ishlar natijasida olti konchining jasadi topilgan. Hodisa vaqtida konda jami yetti kishi bo‘lgan, ulardan biri o‘z kuchi bilan tashqariga chiqishga muvaffaq bo‘lgan.
Dastlabki ma’lumotlarga ko‘ra, kon portlashidan avval Milliy konchilik agentligi tomonidan tekshirilgan. Tekshiruv davomida xavfsizlik talablariga rioya qilinmagani aniqlanib, kamchiliklar bartaraf etilgunga qadar kon faoliyatini to‘xtatish to‘g‘risida ko‘rsatma berilgan.
Shunga qaramay, rasmiylarning ma’lum qilishicha, kon faoliyati davom ettirilgan bo‘lishi mumkin. Endilikda mutaxassislar portlash sabablarini va faoliyatni taqiqlash haqidagi ko‘rsatmaga qaramay, konchilik ishlari qanday davom etganini aniqlaydi.
Kundinamarka gubernatori halok bo‘lgan konchilarning yaqinlariga hamdardlik bildirdi.
Eslatib o‘tamiz, 10-avgust kuni Kolumbiyada 7,4 magnitudali kuchli zilzila sodir bo‘lgan va mamlakatda favqulodda holat e’lon qilingan edi.
