Navoiyda sud raisi YTHda halok bo‘ldi
YTHga avtomobil tezligining yuqori bo‘lgani sabab bo‘lgan. Hodisa sodir bo‘lgan yo‘lning holati ham qoniqarsiz ekani aytilgan.
Jinoyat ishlari bo‘yicha Tomdi tuman sudi raisi Aziza Mirzayeva yo‘l-transport hodisasida halok bo‘ldi. Bu haqda Kun.uz xabar berdi.
Hodisa 15-avgust kuni tushga yaqin “Zarafshon–Tomdi” yo‘lida sodir bo‘lgan. Ma’lum qilinishicha, Aziza Mirzayeva Zarafshon shahridan Tomdi tumaniga Cobalt avtomashinasida ketayotgan bo‘lgan.
Dastlabki ma’lumotlarga ko‘ra, u avtomobil boshqaruvini yo‘qotgan. Oqibatda Cobalt yo‘ldan chiqib, ag‘darilgan. Sud raisi og‘ir tan jarohatlari oqibatida voqea joyida vafot etgan.
Dastlabki taxminlarga ko‘ra, hodisaga avtomobilning yuqori tezlikda harakatlangani sabab bo‘lgan. Shu bilan birga, YTH sodir bo‘lgan yo‘lning holati ham qoniqarsiz ekani aytilmoqda.
39 yoshli Aziza Asatovna Mirzayeva 2024-yil dekabr oyida Navoiy viloyati jinoyat ishlari bo‘yicha Tomdi tuman sudi raisi lavozimiga tayinlangan. U sudyalik lavozimida bo‘lishning birinchi besh yillik muddatiga tasdiqlangan edi. Aziza Mirzayeva ikki farzandning onasi bo‘lgan.
Sudyalar oliy kengashi va Oliy sud uning vafoti munosabati bilan oila a’zolari va yaqinlariga ta’ziya bildirdi.
