Tramp Hormuz bo‘g‘ozini AQSh hududi sifatida e’lon qilmoqchi

 

AQSh prezidenti Donald Tramp Hormuz bo‘g‘ozini Qo‘shma Shtatlar hududi sifatida e’lon qilish rejasi haqida bayonot berdi. U Nyu-York shtati politsiya akademiyasida bo‘lib o‘tgan tadbirda so‘zlar ekan, strategik suv yo‘li hozirda AQSh kuchlari nazoratida ekanini ta’kidlagan.

 

Trampning bayonotiga ko‘ra, AQSh harbiylari Hormuz bo‘g‘ozidagi vaziyatni nazorat qilmoqda. Biroq prezident ushbu hududni AQSh hududi sifatida e’lon qilish tashabbusining huquqiy yoki amaliy tafsilotlariga aniqlik kiritmagan.

 

Hormuz bo‘g‘ozi Eron va Ummon oralig‘ida joylashgan bo‘lib, jahon energetika savdosidagi eng muhim strategik suv yo‘llaridan biri hisoblanadi. Undagi har qanday keskinlik xalqaro neft va gaz bozorlariga bevosita ta’sir ko‘rsatishi mumkin.

 

Eron rasmiylari esa AQShning bo‘g‘oz ustidan nazorat o‘rnatishiga qarshi chiqmoqda. Eron tashqi ishlar vaziri o‘rinbosari Qosim G‘aribobodiy mamlakati AQShning tahdidlari va harbiy kuch namoyishidan ortga chekinmasligini bildirgan.

 

Tomonlar o‘rtasidagi kelishmovchilik fonida Hormuz bo‘g‘ozining kemalar uchun ochiqligi va uning nazorati masalasi xalqaro kun tartibidagi muhim masalalardan biriga aylangan.

 

Eron avvalroq bo‘g‘ozni to‘liq ochish bo‘yicha bir qator shartlarni ilgari surgan. Ular qatorida urush oqibatlari uchun kompensatsiya to‘lash va Eronga nisbatan joriy etilgan sanksiyalarni bekor qilish talablari ham bor.

 

Tramp esa avvalroq AQSh kuchlari Hormuz bo‘g‘ozini minalardan tozalaganini ma’lum qilgan. Oq uy rahbari Tehronga nisbatan iqtisodiy bosimni kuchaytirish harbiy zarbalardan ko‘ra samaraliroq bo‘lishi mumkinligini ta’kidlagan.