"O‘zbekgidroenergo" tizimidagi 8 ta obyektga yangi JAC avtomobillari topshirildi
Yangi transport vositalari tog‘li va murakkab hududlarda xizmat ko‘rsatish ishlarini tezkor tashkil etishga xizmat qilishi bildirildi.
“O‘zbekgidroenergo” AJ tizimidagi energiya ishlab chiqaruvchi korxonalarning transport bazasi yangi avtomobillar bilan mustahkamlandi, deya xabar bermoqda Jamiyat matbuot xizmati.
2026-yilning birinchi yarim yilligida tizim korxonalari tomonidan ishlab chiqarish va xo‘jalik faoliyati bo‘yicha belgilangan reja topshiriqlari o‘z vaqtida va ortig‘i bilan bajarilgani qayd etildi.
Erishilgan ijobiy ko‘rsatkichlarni munosib e’tirof etish, korxonalarning moddiy-texnik bazasini yanada mustahkamlash, ishlab chiqarish jarayonlarining uzluksizligini ta’minlash hamda O‘zbekiston Respublikasi davlat mustaqilligining 35 yilligi arafasida soha mehnat jamoalarini rag‘batlantirish maqsadida energiya ishlab chiqaruvchi qator filiallarning transport bazasi yangi avtomobillar bilan mustahkamlandi.
Jumladan, “O‘rta Chirchiq GESlar kaskadi”, “Farhod GES”, “Samarqand GESlar kaskadi”, “Norin GESlar kaskadi”, “Hisorak GES” va “Qamchiq GES” filiallari, Sardoba suv ombori hamda Yuqori To‘palang hududidagi istiqbolli loyihalar uchun jami 8 ta JAC pikap avtomobili xarid qilindi.
Yangi avtomobillar energetika obyektlarida texnik xizmat ko‘rsatish va ekspluatatsiya ishlarini tezkor tashkil etish, xodimlarning harakatchanligini oshirish hamda xizmat vazifalarini o‘z vaqtida bajarishga xizmat qiladi.
Qayd etilishicha, gidroenergetika obyektlarining aksariyati tog‘li va murakkab relyefli hududlarda joylashgan. Shu bois yangi transport vositalari, ayniqsa, kuz-qish mavsumida noqulay ob-havo va yo‘l sharoitlarida xizmat ko‘rsatish ishlarini samarali tashkil etishda muhim ahamiyat kasb etadi.
“O‘zbekgidroenergo” AJ tomonidan korxonalarning texnik va moddiy bazasini rivojlantirish hamda gidroenergetika obyektlarining barqaror va uzluksiz faoliyatini ta’minlash bo‘yicha ishlar davom ettirilishi ma’lum qilindi.
